Búgin Parlament Senatynyń jalpy otyrysynda depýtat Aqylbek Kúrishbaev igerilmei jatqan jerlerge qatysty Úkimet basshysy Asqar Maminniń atyna depýtattyq saýal joldady, dep habarlaidy "Ult aqparat".
«Aýyldyq jerlerdi órkendetýdiń negizi – jeke qosalqy sharýashylyqtardy damytýdyń naqty mehanizmin qalyptastyrý. Ol úshin ǵaryshtyq monitoring derekteri negizinde, igerilmei nemese tiimsiz paidalanyp jatqan jerlerdi qaityp alý jónindegi jumystatrdy belsendi túrde júrgizý kerek. Sondai-aq, olardy eń aldymen jeke qojalyq sharýalarynyń jer máselelerin sheshý úshin paidalaný qajet», – dedi Aqylbek Kúrishbaev.
Sonymen qatar senator aýyl sharýashylyǵynyń infraqurylymyn damytýdyń tiimdi tetikterin usyndy. Depýtat óz saýalynda: Ákimshilik jáne aimaqtyq áleýmettik kásipkerlik korporatsiialary arqyly biýdjettik jáne nesielik qarjy esebinen qajetti óndiristik infraqurylymdardy salyp, olardy kooperativterge lizingke berý nemese bólip tóleý arqyly satý máselesin kóterdi. Bul jumysqa seriktes retinde sharýashylyqtardy jumyldyrý qajettiligin de atap ótti.
«Olar qolda bar óndiristik infraqurylymdardy paidalaný arqyly jańa qurylǵan kooperativterdiń qalyptasýyn jedeldetýge qol jetkizedi», – deidi depýtat.
