Bokstan Qazaqstan komandasynyń múshesi Ábilhan Amanquldyń jeke bapkeri Nurlan Aqúrpekov búgingi jeńilisten soń shaǵyn suhbat berip, jankúierlerden keshirim surady, dep jazady Olympic.kz.
«Aqtalǵym kelmeidi. Jankúierlerden basymdy iip keshirim suraimyn. Úmitti aqtamadyq. Biz úshin qiyn jaǵdai. Ábilhanǵa búgin psihologiialyq turǵydan qiyn boldy. Óitkeni, burynnan iyǵynda jaraqaty baryn bilesizder. Birneshe ret ota jasattyq. Sońǵy otadan keiin bir jarym jyl boiy úzilis alý kerek edi. Biraq biz Olimpiada ýaqyty jaqyndap qalǵan soń, aitarlyqtai kútim jasamadyq.
Sol jaraqat Tokio tórinde taǵy da syr berdi. Odan qalsa, ózbekstandyq boksshymen ótken jekpe-jekten soń oń judyryǵyn jaraqttap aldy. Qoly da aýyryp tur. Iyǵy men qolyndaǵy jaraqaty onyń keńinen kósilýine múmkindik bermedi.
«Qalai uramyn, qalai jumys isteimin» degen suraqtar sanasyn jaýlap aldy da, psihologiialyq jaǵynan aýyrtpalyq týyndady. Jeńilistiń sebebi osy dep oilaimyn. Onyń ústine, qarsylas ta osal emes. Ol da óte saýatty qorǵana bildi, jaqsy jekpe-jek ótkizdi. Endi Ábilhan biraz demalady. Ol kásibi boksqa barsa da, aldynan osy jaraqat shyǵady. Sondyqtan, tolyq emdelýi kerek. Biylǵy Qazaqstan birinshiligine de qatyspaidy», - deidi bapker.
Aita ketelik, Ábilhan Amanqul 75 keli salmaqtaǵy shirek finaldyq básekede braziliialyq Ebert Konseisan Soýzadan 2:3 esebimen utyldy.
