بوكستان قازاقستان كومانداسىنىڭ مٷشەسٸ ەبٸلحان امانقۇلدىڭ جەكە باپكەرٸ نۇرلان اقٷرپەكوۆ بٷگٸنگٸ جەڭٸلٸستەن سوڭ شاعىن سۇحبات بەرٸپ, جانكٷيەرلەردەن كەشٸرٸم سۇرادى, دەپ جازادى Olympic.kz.
«اقتالعىم كەلمەيدٸ. جانكٷيەرلەردەن باسىمدى يٸپ كەشٸرٸم سۇرايمىن. ٷمٸتتٸ اقتامادىق. بٸز ٷشٸن قيىن جاعداي. ەبٸلحانعا بٷگٸن پسيحولوگييالىق تۇرعىدان قيىن بولدى. ٶيتكەنٸ, بۇرىننان يىعىندا جاراقاتى بارىن بٸلەسٸزدەر. بٸرنەشە رەت وتا جاساتتىق. سوڭعى وتادان كەيٸن بٸر جارىم جىل بويى ٷزٸلٸس الۋ كەرەك ەدٸ. بٸراق بٸز وليمپيادا ۋاقىتى جاقىنداپ قالعان سوڭ, ايتارلىقتاي كٷتٸم جاسامادىق.
سول جاراقات توكيو تٶرٸندە تاعى دا سىر بەردٸ. ودان قالسا, ٶزبەكستاندىق بوكسشىمەن ٶتكەن جەكپە-جەكتەن سوڭ وڭ جۇدىرىعىن جاراقتتاپ الدى. قولى دا اۋىرىپ تۇر. يىعى مەن قولىنداعى جاراقاتى ونىڭ كەڭٸنەن كٶسٸلۋٸنە مٷمكٸندٸك بەرمەدٸ.
«قالاي ۇرامىن, قالاي جۇمىس ٸستەيمٸن» دەگەن سۇراقتار ساناسىن جاۋلاپ الدى دا, پسيحولوگييالىق جاعىنان اۋىرتپالىق تۋىندادى. جەڭٸلٸستٸڭ سەبەبٸ وسى دەپ ويلايمىن. ونىڭ ٷستٸنە, قارسىلاس تا وسال ەمەس. ول دا ٶتە ساۋاتتى قورعانا بٸلدٸ, جاقسى جەكپە-جەك ٶتكٸزدٸ. ەندٸ ەبٸلحان بٸراز دەمالادى. ول كەسٸبي بوكسقا بارسا دا, الدىنان وسى جاراقات شىعادى. سوندىقتان, تولىق ەمدەلۋٸ كەرەك. بيىلعى قازاقستان بٸرٸنشٸلٸگٸنە دە قاتىسپايدى», - دەيدٸ باپكەر.
ايتا كەتەلٸك, ەبٸلحان امانقۇل 75 كەلٸ سالماقتاعى شيرەك فينالدىق بەسەكەدە برازيلييالىق ەبەرت كونسەيسان سوۋزادان 2:3 ەسەبٸمەن ۇتىلدى.
