Almatyda úsh adamnyń ólimine sebepker bolǵan kólik júrgizýshisi Iliias Karǵa sot úkimi shyqty, dep habarlaidy "Ult aqparat".
Almaty aýdandyq sotynyń sýdia Roman Selitskii 34 jastaǵy sottalýshy Iliias Kardy 10 jylǵa bas bostandyǵynan aiyrý týraly úkim etti. Ol jazasyn qaýipsizdigi barynsha tómen mekemede óteitin bolady. Sondai-aq ol 7 jyl kólik tizgindeý quqyǵynan airyldy.
Memlekettik aiyptaýshy I.Kardy 8 jylǵa bas bostandyǵynan aiyrýdy suraǵan bolatyn.
Eske salaiyq, jol-kólik oqiǵasy 29 jeltoqsanda boldy. Abai jáne Seifýllin kósheleriniń qiylysynda Mersedes Gelandewagen men Mitsubishi Galant kólikteri soqtyǵysqan. Birinshi kólik baǵdarshamnyń qyzyl túsine ótip ketken. Jol apatynan 3 adam - Mitsubishi Galant júrgizýshisi men eki jolaýshy kóz jumdy. Olardyń arasynda belgili aktrisa Sholpan Elgezek bar. Keiin belgili bolǵandai, 34 jastaǵy Gelandewagen júrgizýshisi kóligin mas kúiinde júrgizgen.
Mercedes Gelandewagen júrgizýshisi, 1985 jyly týǵan Iliias Kar sot aldynda QR QK-niń 345-inshi jáne 347-baptary boiynsha jaýap berdi.
Aita keteiik, atalǵan jol apatynan aman qalǵan jalǵyz jolaýshy - aktrisa Aizada Satybaldieva qabyrǵalary synyp, aýyr halde aýrýhanaǵa túsken bolatyn. Eki aptadan soń aktrisanyń beti beri qarap, úiine shyǵaryldy.
