Elimizdiń Mádeniet jáne sport ministri Aqtoty Raiymqulova halyqaralyq «Slavian bazary» baiqaýynda bas júldeni jeńip alǵan otandasymyz, jas ánshi Rýhiia Baidúkendi jeńisimen quttyqtady, dep habarlaidy "Ult aqparat"
«Biz Rýhiiany jeńisimen quttyqtaý úshin onlain jinalyp otyrmyz. Jeńis qutty bolsyn! Rahmet saǵan. Rýhiia sen jas bolsań da, óte talanttysyń. Sen Dimashtyń jeńisin qaitaladyń, onyń saǵan tálimger bolǵan eńbegi aqtaldy. Árine, bul úlken óner men kásibi sahnanyń bastaýy ǵana», - dedi Raiymqulova ZOOM arqyly ótken baspasóz máslihatynda.
Sondai-aq, ministr jerlesimizdiń el úmit aqtap, Qazaqstannyń atyn álemge taǵy bir tanymal etkenin aitty.
«Bul - Rýhiia qatysqan birinshi baiqaý emes. Buǵan deiin de birneshe óner baiqaýlaryna qatysyp, jetistikterge jetip júr. Rýhiianyń ómirbaianyna qarap otyrsaq, ol 2010 jyldan beri qarai túrli baiqaýlardan jeńispen oralyp keledi. Jalpy óner súier qaýym qazaqstandyq qatysýshylardy «Slavian bazary» baiqaýynda únemi asyǵa kútip, zor qurmetpen qarsy alady. Al Rýhiia saǵan sáttilik tileimiz, aldaǵy ýaqytta basqa da álemdik sahnalardyń tórinen kóremiz dep senemin. Sen el úmitin aqtadyń», - dedi ol.
Buǵan deiin Rýhiia Baidúkenniń Vitebskide ótken «Slavian bazary» baiqaýynyń gran-pri júldesin jeńip alǵanyn habarlaǵan bolatynbyz.
14 memleketten kelgen qatysýshy slavian elinen shyqqan kompozitordyń týyndysyn slavian tobyna jatatyn tildiń birinde orkestrdiń súiemeldeýimen oryndady. Baiqaý nátijesinde qazaqstandyq Rýhiia Baidúkenova Gran-pri iegeri atanyp, «Altyn lira» músinshesimen birge 20 myń AQSh dollaryna ie boldy.
