Mádeniet jáne sport ministri Aqtoty Raiymqulova qiyndyq týǵyzǵan qazaqstandyq týristerdi elge qaitarý jumysy qalai atqarylǵanyn aityp berdi, dep habarlaidy QazAqparat.
«Búgingidei shtattan tys jaǵdaida shet memleketterde júrgen demalýshylarǵa qoldaý kórsetý maqsatynda 2016 jyly Úkimettiń qaýlysymen «Týristik Qamqor» qory qurylǵan bolatyn. Týristik qyzmetterdi usyný sharttary árqashan ýákiletti organnyń baqylaýynda. Mine, osyndai keshendi is-sharanyń arqasynda biz elde tótenshe jaǵdai jariialanǵan tusta shet elge shyqqan 5 913 týristi der kezinde elge qaitardyq», - dedi ministr OKQ-da ótken baspasóz máslihatynda.
Ministrdiń aitýynsha, elge qaitarylǵandardyń 1 823-i josparly túrde qaitarylsa, 3 748 týrist arnaiy uiymdastyrylǵan 19 charterlik reispen elge jetkizilgen. Taǵy 342 adam sheteldik áýe tasymaldaýshylarymen kelisip, arnaiy ushaqtarmen qaitarylǵan.
«Bul rette memlekettiń óz azamattaryna degen erekshe qamqorlyǵyn aita ketý kerek. Elge jetkizilgen ár týrist Qazaqstannyń sanitarlyq qyzmeti bekitken erejelerge sáikes tekserýden ótti», - dedi ol.
