QR Mádeniet jáne sport ministri Aqtoty Raiymqulova Almaty qalasynda ziialy qaýym ókilderimen kezdesti, dep habarlaidy "Ult aqparat" vedomstvo baspasóz qyzmetine silteme jasap.
A.Raiymqulova megapolistegi sala qyzmetkerlerimen ótken jiynda Prezident Qasym-Jomart Toqaevtyń «Syndarly qoǵamdyq dialog – Qazaqstannyń turaqtylyǵy men órkendeýiniń negizi» Joldaýy jaily, onda kórsetilgen mindetterdi júzege asyrý jaiynda aityp berdi.
Ministrdiń dereginshe, keler jyldan mádeniet salasy qyzmetkerleriniń eńbekaqysy 40 paiyzǵa ósedi. Iaǵni, teatr ártisteriniń ortasha jalaqysy 231 myń teńge, al, kitaphana, mýzei jáne arhiv qyzmetkerleriniń eńbekaqysy 164 myń teńge bolady. Sóz barysynda ministr qazir elimizdegi eń tómengi jalaqy mádeniet qyzmetkerlerinde ekenin atap ótti. Al, salanyń damýy úshin mamandardyń áleýmettik jaǵdaiy joǵary bolǵany mańyzdy. Sondyqtan, ulttyń óneri men rýhaniiatyna eńbek sińirip júrgen mádeniet qyzmetkerlerine memlekettik qoldaý arta beretinin jetkizdi.
«Mádeniet pen óner qyzmetkerleriniń jaǵdaiyn kóterý josparymyzdyń bir tarmaǵy ǵana. Qazir áleýmettik jeńildikter máselesi pysyqtalyp jatyr. Mádeniet jáne sport ministrligi memorandýmdar ázirlep, ákimdikterge jiberdi. Olardy oryndaý úshin áleýmettik qoldaý sharalaryn, onyń ishinde mádeniet jáne óner qyzmetkerleriniń turǵyn úi jaǵdaiyn jaqsartýdy qamtityn salalyq josparlar bekitiletin bolady. Jastardyń turǵyn úi alýy úshin 3 million 700 myń teńgeniń kólemindegi biýdjettik nesie beriledi», - dedi QR Mádeniet jáne sport ministri.
Ziialy qaýym ókilderi biylǵy Prezident joldaýyndaǵy áleýmettik máselelerdi sheshýge baǵyttalǵan bóligine rizashylyqtaryn jetkizdi.
