QR Mádeniet jáne sport ministri Aqtoty Raiymqulova mádeniet qyzmetkerleri baspanamen qalai qamtylatyndyǵyn aitty, dep habarlaidy QazAqparat.
«Qyzmetkerlerdiń turǵyn úi jaǵdailaryn jaqsartý maqsatynda 2020 jylǵy 23 qazanda QR Mádeniet jáne sport ministrligi men «Qazaqstandyq ipotekalyq kompaniiasy» Ipotekalyq uiymy» AQ arasynda 2020-2025 jyldarǵa arnalǵan «Nurly jer» turǵyn úi-kommýnaldyq damytý memlekettik baǵdarlamasynyń qatysýshylary úshin satyp alý quqyǵymen jalǵa beriletin turǵyn úi satyp alý týraly kelisimge qol qoiyldy. Memlekettik baǵdarlama aiasynda ministrliktiń memlekettik qyzmetshilerine Nur-Sultan qalasynan 20 páter bólindi», - dedi ministr QR Prezidenti janyndaǵy Adam quqyqtary jónindegi komissiianyń otyrysynda.
Onyń dereginshe, Almaty qalasynda Mádeniet jáne sport ministrligine vedomstvolyq baǵynysty uiymdardyń qyzmetkerlerine 16 páter jáne Nur-Sultan qalasyna 47 páter bólindi. Aqtóbe oblysynda jastar men mádeniet, óner, arhiv mekemeleri qyzmetkerlerin áleýmettik qoldaý maqsatynda 14 qyzmettik jáne 25 jalǵa beriletin páter berildi. Onyń ishinde teatr, kitaphana, mýzei salasynyń 13 jas mamany jalǵa beriletin páterlermen qamtamasyz etildi.
«Sonymen qatar, Mádeniet jáne sport ministrliginiń qoldaýymen Mádeniet, arhivter jáne qujattama basqarmasynyń 38 mamanynyń QIK baǵdarlamasy boiynsha satyp alý quqyǵymen 1 bólmeli jalǵa beriletin páterlerge qol jetkizý máselesi qarastyrylýda», - dedi Aqtoty Raiymqulova.
