Mamyrdyń 12-sine Aqtóbede qaita ashylǵan halyqqa qyzmet kórsetý ortalyqtarynda kezek kúrt kóbeiip, júzdegen adam jinaldy.
Aqtóbeniń Týrgenev kóshesindegi ortalyqqa jinalǵandar jańbyr astynda saǵattap turǵan. Kei azamattar kezek alý úshin ortalyqqa tańǵy saǵat segizde kelgenin aitady.
Ortalyq ókili Janat Aldamjarovanyń sózinshe, Qazaqstanda halyqqa qyzmet kórsetý ortalyqtary koronavirýs indetine bailanysty jańa formatpen jumys istei bastaǵan. Sondyqtan ortalyqqa kelmes buryn azamattar egov portaly nemese 1414 nómiri arqyly bron jasaýy kerek.
-HQKO qyzmetin paidalaný úshin egov arqyly kezek alý kerek eken. Onyń istemei turǵanyna birneshe kún boldy. Mundaǵylar kei qyzmet túrlerin egov-tan alyńdar deidi. Ol múlde múmkin emes,- deidi jaýyn astynda qalǵan Ǵaliia Áminova.
Anar esimdi Aqtóbe turǵyny karantin kezinde qujattardy onlain rásimdei almaǵanyn aitady.
-Sáýirdiń basynda aǵam balaly bolǵan. Balanyń qujattary áli rásimdelgen joq. Qujaty joq balaǵa emhanalar da qaramaidy.1414 nómirine qaita-qaita habarlasyp, úmit úzdik. Egov-qa kire almaǵanymyzǵa on kún boldy,- deidi.
Aqtóbe qalalyq halyqqa qyzmet kórsetý ortalyǵynyń ókili Janat Aldamjarova "Kóp salmaq túskende Egov portalynyń jumysy baiaýlaityny ras. Qujatyn onlain rásimdei almai júrgender araǵa biraz ýaqyt salyp, portalǵa qaita kirýi kerek" deidi.
Aqtóbe ákimdiginiń habarlaýynsha, 12 mamyrdan bastap ákimdikter, sýpermarketter men orta bilim beretin mektepterde halyqqa qyzmet kórsetý buryshtary qurylǵan. "Ol buryshtar turǵyndarǵa qujattardyń kei túrlerin rásimdeýge kómektesedi. Aqtóbede halyqqa qyzmet kórsetetin 90 burysh jasaqtaý josparlanyp otyr. Ázir onyń barlyǵy birdei ashylǵan joq" dep habarlaidy ákimdik.
Tótenshe jaǵdai rejimi men karantinge bailanysty onlain jumysqa kóshken Aqtóbe qalasynyń halyqqa qyzmet kórsetý kórsetý ortalyǵynyń úsheýi ǵana qaita ashylǵan.
