Aqtóbede iri bazarlar men meiramhana ieleri oblystyq taýarlar jáne kórsetiletin qyzmetter sapasy men qaýipsizdigin baqylaý departamentiniń basshysymen kezdesti, dep habarlaidy "Ult aqparat".
Oblystyq kásipkerler palatasy biznes ielerin jinap, oblystyq taýarlar jáne kórsetiletin qyzmetter sapasy men qaýipsizdigin baqylaý departamentiniń basshysy Nursulý Berkimbaevamen kezdestirdi. Onlain kezdesýge qosylǵandar da boldy.
«Aqtóbede 278 adam koronavirýs infektsiiasyna shaldyǵyp, 206 adam emdelip shyqty. Men kásipkerlerge alǵys aitamyn. Sebebi bári ýaqtyly meiramhana, dámhana, bazarlardy jaýyp, tótenshe jaǵdai talabyn saqtady. Al 22 mamyr kúni elimizdiń bas sanitar dárigeriniń qaýlysy qaita shyqty. Sonda anyq jazylǵan. Ósim 7 paiyzdan aspaýy tiis. Qazir oblys ákimdigindegi shtab kelisimimen birneshe bazar jumys istep tur. Bári azyq-túlik satady. Ózgesine ruqsat berilmedi. Búginde monitoring toby bazarlardy aralap júr. Olardyń ortaq sheshiminen soń, daiyndyq aktisi berilse, sanitarlyq ereje qatań saqtalsa, iri bazarlar ashylýy múmkin», - dedi Nursulý Berkimbaeva.
Oblysta buǵan deiin dámhanalardyń jumysyna ruqsat berilgen bolatyn. Tek kelýshiler qatary 30-dan aspaýy tiis.
«Meiramhanalar da 30 adamǵa ǵana qyzmet kórsete alady. Tipti 200 adamǵa arnalǵan meiramhana bolsa da adam sany shekteledi. Ózgesine jol joq. Demalys ornynyń jumysy 20:00-de aiaqtalýy tiis. Osy aptada baqylap, sheshimdi qosymsha habarlaimyz. Kásipkerler túsinýi tiis. Koronavirýs bar, kez kelgen usaq-túiek qaýipsizdik erejesin saqtamasaq qiyn bolady. Jyl sońyna deiin shydamdylyqpen kútemiz. Meditsinalyq maska kiip, araqashyqtyqty saqtaiyq. Ókinishke qarai, sońǵy derekter aýyzasharda tirkeldi. Týma-týys, bútin otbasy tirkeldi. Ata-ájesi, ata-anasy, balasy... Tamaqtaný oryndarynda 30 adamǵa ruqsat berilgenniń ózinde otbasylyq merekeni uiymdastyrýdyń qajeti joq», - dedi N.Berkimbaeva.
Eske salsaq, Aqtóbede sońǵy eki aptada karantin rejimi jeńildemedi.
