Memleket basshysy Nursultan Nazarbaevtyń bastamasymen qazaqstandyqtar biyl tuńǵysh ret Ulttyq dombyra kúnin toilaýda. Aqtóbe oblysy merekeni uiymdastyrýǵa erekshe atsalysty. Barlyq eldi mekenderde ótken 750 is-sharaǵa 270 myń oblys turǵyny qatysty.
Ulttyq dombyra kúnine arnalǵan úlken mereke 30 maýsymda bastalǵan bolatyn. Aqtóbede eki jyl buryn ornatylǵan 6 metrlik dombyra janynda dombyrashylardyń sherýi men baiqaýy ótti.
1 shildede oblys ortalyǵynyń da kógin uly dalanyń áýenderi kernedi. Júzdegen kásibi mýzykanttar men áýesqoi dombyrashylar qazaq halqynyń kórnekti kompozitorlarynyń ólmes týyndylaryn qalanyń ártúrli jerindegi 6 ashyq alańda bir mezgilde oryndaý arqyly ulttyq mýzykalyq aspapqa degen súiispenshilikterin bildirdi.
Ertemen bastalǵan merekelik sharalar 12 saǵatqa sozyldy. Aqtóbe qalasy men aýdan ortalyqtarynyń barlyq turǵyndary men qonaqtaryna dombyrashylar kontserti, dombyrada oinaýdy úiretý men aǵash qolóneriniń sheberlik sabaqtary, jas kúishiler baiqaýy, ekspozitsiialyq jáne kitap kórmeleri, dombyra-pati, qoldanbaly óner buiymdarynyń jármeńkesi men mýzykalyq viktorinalar uiymdastyryldy.
Merekeniń eń jas qonaqtary úshin arnaiy oiyn-saýyq baǵdarlamasy daiyndaldy.
Aqtóbelikter óńirde 1 shilde kúni dúniege kelgen árbir tuńǵysh balaǵa dombyra tartý etýimen de erekshelendi.
Negizgi mereke Ortalyq stadionda saǵat 18:00-de bastaldy. Onyń aqyrǵy akkordy 500 dombyrashynyń stadionda «Aqtóbe» - «Shahter» fýtbol matchynyń aldynda «Balbyraýyn» jáne Qurmanǵazynyń «Adai» kúilerin, Ahmet Jubanovtyń «Bi kúiin» oinaǵan fleshmoby boldy.
Aita keteiik, sol kúni Ǵ.Jubanova atyndaǵy Aqtóbe oblystyq filormoniiasynyń ulttyq aspaptar orkestri qazaq ulttyq aspaptar murajaiynyń ashylýynda elorda turǵyndary men qonaqtaryn ózderiniń shyǵarmalarymen qýantty.
