Aqtóbeniń qylmystyq ister jónindegi mamandandyrylǵan aýdanaralyq soty "Terroristik top qurý, oǵan basshylyq etý jáne onyń áreketine qatysý" baby boiynsha aiyptalǵan er adamdarǵa qatysty sot úkimin shyǵardy, - dep habarlaidy kaz.tengrinews.kz tilshisi sottyń baspasóz qyzmetine silteme jasap.
Sot materialdaryna qaraǵanda, S.R. Qudaibergenov sheteldegi dini ekstremizm ýaǵyzdaýshylarynyń radikal kózqarastaryn qoldai otyryp, RF quqyq qorǵaý organdary men Resei Federatsiiasynyń azamattaryna qarsy qarýly jihad jasaý úshin terroristik top qurmaq bolǵan.
Osy maqsatta ol 2016 jyldyń 19 tamyzynda óziniń jaqtaýshylary Q.S.Esenǵulovpen, G.A.Boranbaevpen, kámeletke tolmaǵan E.N.Bolatbaevpen jáne N.Seiitqalimen jaldamaly páterde jinalǵan. Sol jiynda S.R. Qudaibergenov kelgen adamdardy terroristik top qurýǵa shaqyrǵan. Al 2016 jyldyń 21 tamyzynda S.R.Qudaibergenov terroristik toptyń barlyq múshesin Aqtóbedegi №13 mekteptiń aýlasynda jinaǵan. Onda D.A.Bisenǵali men kámeletke tolmaǵan N.Q.Sábitov pen Á.M.Jalǵas kelgen. Olar terroristik toptyń quramyna kirýge kelisim bergen.
Sondai-aq, is materialdaryna qaraǵanda, K.S.Esenǵulov "Vkontakte" áleýmettik jelisi arqyly terrorizm men dini ekstremizmdi nasihattaǵan. Ol jelige Holid Seifýllah degen laqap atpen tirkelgen. Esenǵulov "Vkontakte" áleýmettik jelisindegi paraqshasynda radikal jáne ekstremistik mazmundaǵy materialdardy jariialaǵan.
2016 jyldyń 28-30 tamyz ailarynda ótkizilgen jedel-izdestirý sharalary barysynda Qudaibergenov óziniń jaqtaýshylarymen birge ustaldy.
Sottyń 2017 jylǵy 6 qańtaryndaǵy úkimimen S.R.Qudaibergenov QR Qylmystyq kodeksiniń 257-babynyń 1-bóligi boiynsha aiypty dep tanylyp, 9 jylǵa deiin bas bostandyǵynan aiyryldy. Al terroristik toptyń qalǵan músheleri alty jyldan toǵyz jylǵa deiin bas bostandyǵynan aiyryldy.
