"Islam memleketi" ekstremistik uiymynyń baspasóz hatshysy Ábý Muhammed ál-Adnani.
"Islam memleketi" (IM) ekstermistik uiymymen bailanysty "Amak" agenttiginiń habarlaýynsha, Siriianyń soltústiginde uiymnyń baspasóz hatshysy ári uiym jetekshileriniń biri Ábý Muhammed ál-Adnani qaza tapty. Áskeri ortadaǵy derekkózine silteme jasaǵan agenttik Adnanidiń "Aleppo mańyndaǵy operatsiiaǵa qolbasshylyq jasap júrgende oqqa ushqanyn" aitady.
AQSh qorǵanys ministrligindegi aty-jónin atamaǵan derekkózi Aleppo provintsiiasynyń ál-Bab qalasynda áýeden dáldep jasalǵan shabýyldan "IM jetekshileriniń biriniń" kózi joiylǵanyn aitty. Ol sodyrdyń aty-jónin aitýdan bas tartyp, áskeri operatsiianyń nátijeleri saralanyp jatqanyn jetkizdi.
IM sońǵy aptalarda ásirese Aleppo provintsiiasynda birneshe ret jeńiliske ushyrady. Munda Túrkiia áskeri kóterilisshilermen birigip IM sodyrlarynan Jerablýs qalasyn qaitaryp aldy. Siriiadan shyqqan Adnani IM qurylǵannan beri onyń joǵary shendi músheleriniń biri boldy. AQSh ol týraly aqparat bergen adamǵa bes million dollar kóleminde syiaqy tikken.
Qazaqstan syrtqy ister ministri Erlan Ydyrysov buǵan deiin maýsymnyń basynda Aqtóbede bolǵan shabýyldardy jasaǵandar "Adnaniden tapsyrma alǵanyn" málimdegen. «Bizdiń anyqtaǵanymyzdai, qasietti Ramazan aiynyń qarsańynda DAISh (IM-niń basqasha atalýy - red.) dep tirkelgen toptyń Adnani degen basshysy óziniń artynan ergenderge internet arqyly zorlyq-zombylyq jasaýdy tapsyrǵan» degen Erlan Ydyrysov.
