Aqtóbede «Parijskaia kommýna-XXI» jaýapkershiligi shekteýli seriktestiginiń birneshe bóliginde jumys ýaqytsha toqtady, dep habarlaidy "Ult aqparat".
Aqtóbe oblysynyń ekonomikalyq sotynda oblystyq ekologiia departamentiniń talap aryzy qaraldy.
Aryzda «Parijskaia kommýna-XXI» JShS sharýashylyq júrgizý qyzmetin toqtatý, qorshaǵan ortaǵa emissiia ruqsatynan jáne memlekettik ekologiialyq saraptamanyń oń qorytyndysynan aiyrý týraly azamattyq isteri qaraldy.
Is materialyna súiensek, ótken jyldyń jeltoqsan aiynda Alǵa aýdany, Bestamaq aýyly turǵyndarynyń aryzy negizinde oblystyq ekologiia departamenti tekserý júrgizdi.
Nátijesinde óndiristik aǵyn sýlardyń jer bederine aqqany, tazartý qurylǵylarynyń aýmaǵynda EKO B-500 jabdyǵy jáne ÝF zararsyzdandyrý qudyǵynyń bolmaǵany anyqtaldy.
Biologiialyq qaldyqtar qoimasynyń aýmaǵy qorshalmaǵan. Qorshaǵan ortany qorǵaityn beton qudyq joq.
Sonymen birge shoshqa sany ferma qýatynan asyp tústi.
Iaǵni, jobaǵa sáikes 40 000 bas bolýy qajet. 2018 jyly mal sany - 50 615, 2019 jyly - 51 095, 2020 jyly - 51 978 bas bolǵan.
«Seriktestik memlekettik ekologiialyq saraptamanyń qorytyndysyndaǵy talaptardy saqtamaǵan. Sot sheshimimen oblystyq ekologiialyq departamenttiń talaptary qanaǵattandyryldy. Óndiristik aǵyn sýlardy saqtaý qoimalaryna jáne jer bederine jiberý, biologiialyq qaldyqtardy saqtaý qoimasyn paidalaný bóligindegi buzýshylyqtar qalpyna kelgenge deiin fermadaǵy jumys ýaqytsha toqtatyldy. Sonymen birge jaýapker qorshaǵan ortaǵa emissiia ruqsatynan aiyryldy jáne memlekettik ekologiialyq saraptamanyń oń qorytyndysy joiyldy. Sot sheshimi zańdy kúshine engen joq», - dep habarlady Aqtóbe oblysy mamandandyrylǵan aýdanaralyq ekonomikalyq sotynyń baspasóz qyzmeti.
Aita keteiik, buǵan deiin sharýashylyqtaǵy zańsyzdyqtarǵa bailanysty shoshqa fermasyna 7 mlrd teńge aiyppul salyndy.
