Aqtóbe oblystyq perinataldyq ortalyqta 30 jastaǵy Aimira Atshybaeva kóz jumdy, dep habarlaidy "Ult aqparat".
Aqtóbe oblystyq perinataldyq ortalyqqa búgin kóz jumǵan Aimira Atshybaevanyń týǵan-týystary kelip, qaiǵyly oqiǵanyń sebebin surady.
«Kelinshegim 17-mamyr kúni kóz jumdy. Dárigerler «ókpesinde kinárat bar» dep aitty. Biraq áielim kúni búginge deiin densaýlyǵyna shaǵymdanyp, ókpesi aýyratynyn aitpady. Júktiligi jaqsy ótti. Osy jaǵdai boiynsha durys sheshim qabyldaǵanyn qalaimyn. Meniń maqsatym túrmege otyrǵyzyp, bas bostandyǵynan aiyrý emes. Maman qatesi úshin jaýap bersin», - dedi Altynbek Jumaǵaziev.
Týma-týysynyń kóp suraǵyn dárigerler perzenthana syrtyna shyǵyp tyńdady.
«Aldymen tolǵaq shaqyratyn dári bergen. Keiin onyń palatada bosanǵanyn bildik. Es-túsin bilgen. Balasyn baýyryna basty. Sodan keiin qan toqtamai, onyń jansaqtaý bólimine jetkizilgenin bilip otyrmyz. Kóp uzamai kóz jumdy», - dedi marqumnyń jeńgesi Gúldan Aqmambetova.
Qaiǵydan qan jutqan týǵan-týys talap etken kezde ǵana bas dáriger kóńil aitty.
«Qazir arnaiy komissiia quryldy. Tekserý qorytyndysynan soń shara qoldanylady», - dedi oblystyq perinataldyq ortalyqtyń bas dárigeri Ashat Balyqov.
Aita keteiik, qazir bala ákesine berildi. Salmaǵy - 4,5 keli.
«Jas ana sý ketip, bizge tústi. Bir táýlik boiy baqylaý júrgizildi. Keiin úsh dáriger qarap shyqtyq. Bala oń kelgen. Salmaǵy da iri bolady dep oilamadyq. Óz betimen bosanady dep sheshim qabyldandy. Shynynda da sábiin ózi ómirge ákeldi», - dedi bosaný bóliminiń meńgerýshisi Aleksei Hasanov.
