اقتٶبە وبلىستىق پەريناتالدىق ورتالىقتا 30 جاستاعى ايميرا اتشىباەۆا كٶز جۇمدى, دەپ حابارلايدى "ۇلت اقپارات".
اقتٶبە وبلىستىق پەريناتالدىق ورتالىققا بٷگٸن كٶز جۇمعان ايميرا اتشىباەۆانىڭ تۋعان-تۋىستارى كەلٸپ, قايعىلى وقيعانىڭ سەبەبٸن سۇرادى.
«كەلٸنشەگٸم 17-مامىر كٷنٸ كٶز جۇمدى. دەرٸگەرلەر «ٶكپەسٸندە كٸنەرات بار» دەپ ايتتى. بٸراق ەيەلٸم كٷنٸ بٷگٸنگە دەيٸن دەنساۋلىعىنا شاعىمدانىپ, ٶكپەسٸ اۋىراتىنىن ايتپادى. جٷكتٸلٸگٸ جاقسى ٶتتٸ. وسى جاعداي بويىنشا دۇرىس شەشٸم قابىلداعانىن قالايمىن. مەنٸڭ ماقساتىم تٷرمەگە وتىرعىزىپ, باس بوستاندىعىنان ايىرۋ ەمەس. مامان قاتەسٸ ٷشٸن جاۋاپ بەرسٸن», - دەدٸ التىنبەك جۇماعازيەۆ.
تۋما-تۋىسىنىڭ كٶپ سۇراعىن دەرٸگەرلەر پەرزەنتحانا سىرتىنا شىعىپ تىڭدادى.
«الدىمەن تولعاق شاقىراتىن دەرٸ بەرگەن. كەيٸن ونىڭ پالاتادا بوسانعانىن بٸلدٸك. ەس-تٷسٸن بٸلگەن. بالاسىن باۋىرىنا باستى. سودان كەيٸن قان توقتاماي, ونىڭ جانساقتاۋ بٶلٸمٸنە جەتكٸزٸلگەنٸن بٸلٸپ وتىرمىز. كٶپ ۇزاماي كٶز جۇمدى», - دەدٸ مارقۇمنىڭ جەڭگەسٸ گٷلدان اقمامبەتوۆا.
قايعىدان قان جۇتقان تۋعان-تۋىس تالاپ ەتكەن كەزدە عانا باس دەرٸگەر كٶڭٸل ايتتى.
«قازٸر ارنايى كوميسسييا قۇرىلدى. تەكسەرۋ قورىتىندىسىنان سوڭ شارا قولدانىلادى», - دەدٸ وبلىستىق پەريناتالدىق ورتالىقتىڭ باس دەرٸگەرٸ اسحات بالىقوۆ.
ايتا كەتەيٸك, قازٸر بالا ەكەسٸنە بەرٸلدٸ. سالماعى - 4,5 كەلٸ.
«جاس انا سۋ كەتٸپ, بٸزگە تٷستٸ. بٸر تەۋلٸك بويى باقىلاۋ جٷرگٸزٸلدٸ. كەيٸن ٷش دەرٸگەر قاراپ شىقتىق. بالا وڭ كەلگەن. سالماعى دا ٸرٸ بولادى دەپ ويلامادىق. ٶز بەتٸمەن بوسانادى دەپ شەشٸم قابىلداندى. شىنىندا دا سەبيٸن ٶزٸ ٶمٸرگە ەكەلدٸ», - دەدٸ بوسانۋ بٶلٸمٸنٸڭ مەڭگەرۋشٸسٸ الەكسەي حاسانوۆ.
