Aqtóbedegi oqiǵadan keiin lańkestik akt daiyndaǵan 7 radikaldy top pen 4 adamnyń joly kesildi. Bul týraly búgin QR Ulttyq qaýipsizdik komiteti tóraǵasynyń orynbasary Marat Qalqabaev Parlament Májilisiniń jalpy otyrysynda málimdedi, dep habarlaidy "Ult aqparat" Baq.kz portalyna silteme jasap.
Búgin Marat Qalqabaev «Qazaqstan Respýblikasynyń keibir zańnamalyq aktilerine ekstremizmge jáne terrorizmge qarsy is-qimyl máseleleri boiynsha ózgerister men tolyqtyrýlar engizý týraly» zań jobasyna qatysty baiandama jasady.
«Qurmetti depýtattar, sizderdiń qaraýyńyzǵa usynylǵan zań jobasyn daiyndaýǵa elimizde jáne álemde bolyp jatqan terrorlyq qylmystar yqpal etti. Oǵan qarsy kúrestiń oń praktikasy eskerildi. Quzyrly memlekettik organdar ekstremizm men terrorizmge qarsy júieni damytý boiynsha turaqty jumys atqaryp keledi. Degenmen, Aqtóbe men Almatyda oryn alǵan sońǵy jaǵdailar osy saladaǵy zańdyq negizderge ózgerister men tolyqtyrýlar qajettiligin týyndatqan indikatorlarǵa ainaldy. Sol sebepten Memleket basshysy 10 maýsym kúni Qaýipsizdik keńesiniń otyrysynda ekstremizm men terrorizmge qarsy is-qimyl salasyndaǵy zańnamany jetildirýge qatysty sharalar qabyldaý týraly tapsyrma bergen bolatyn», - deidi M.Qalqabaev.
Onyń aitýynsha, búgingi tańda qaqtyǵys aýmaǵynan tys jerlerde terrorizm keń etek ala bastady. Frantsiia, Túrkiia, Belgiiada oryn alǵan sońǵy oqiǵalar terroristik aktilerge qarsy is-qimyl aýmaǵyn keńeitý kerektigin kórsetip otyr. Internette terrorizm ideialaryn nasihattaýmen qatar, túrli elderde azamattardy lańkestik akti jasaýǵa úgittei bastaǵandar bar.
«Ár zorlyq-zombylyq azamattarymyzdyń radikaldaný protsesine jol ashady. Mysaly, Aqtóbedegi oqiǵadan keiin lańkestik akt daiyndaǵan 7 radikaldy top pen 4 azamattyń joly kesildi. Sondyqtan, jańa zań jobasynda terroristik jáne ekstremistik qylmystar úshin jaza kúsheitilmek», - dedi M.Qalqabaev.
