Káýger Aqtóbe oblysynda 52 adamnyń ómirin jalmaǵan avtobýstaǵy órttiń qalai shyqqanyn aityp berdi, dep málimdeidi Ren.tv arnasy.
Onyń aitýynsha, jolaýshylar dánekerleitin shammen jylynyp otyrǵan. Kenet kólik ishinde bireýler ózara eregisip qalǵan.
"Avtobýstaǵylar dánekerleitin shammen jylynyp bara jatqan. Bir kezde jolaýshylar ózara shekisip, biri ekinshisine janarmai toly qutyny laqtyryp jibergen. Sodan janarmai dánekerleitin shamǵa tiip, órt lap ete túsken. Sóitip, salon ishindegiler qashyp úlgere almaǵan",– deidi kýáger.
Eske salaiyq, osyǵan deiin Aqtóbede avtobýs órtenip, 52 adamnyń qaza tapqany jaily habarlanǵan bolatyn. Ikarus markaly avtobýstyń 18 qańtarda saǵat 10:30-da Aqtóbe oblysy Yrǵyz aýdanynda Samara - Shymkent tasjolynyń 1068 shaqyrymynda, Qalybai aýylynan 10 shaqyrym jerde órtengeni aitylǵan edi. Avtobýstyń ishinde 55 jolaýshy jáne eki júrgizýshi bolǵan. Onyń beseýi avtobýstan shyǵyp úlgergen. Keiin oqiǵa ornynan túsirilgen video men fotosýretter jariialandy.
