Aqtóbelikter Arys qalasynyń turǵyndaryna kómek berip jatyr. «SNPS-Aqtóbemunaigaz» AQ 50 million teńge aýdardy, dep habarlaidy QazAqparat tilshisi.
Arys qalasyndaǵy tótenshe jaǵdaiǵa bailanysty «Nur Otan» partiiasy filialy ǵimaratynda gýmanitarlyq kómek beketi ashyldy. Aqparat áleýmettik jeli arqyly tarady.
«Halyq túni boiy habarlasyp, qandai kómek qajet ekenin surap bildi. Alǵashqy kómek retinde eki júk kóligi attandy. Sý, ósimdik maiy, makaron sekildi eń qajetti tamaq jiberilip jatyr. Bizdiń oblysta tótenshe jaǵdai bolǵanda ózge oblystar kómektesti, biz de qol ushymyzdy sozamyz», - dedi «Jas Otan» jastar qanatynyń jetekshisi Asyljan Búrkitalin.
Qala turǵyndary qolda baryn bólisip jatyr.
«Áleýmettik jeli arqyly aqparatty bilip, «Nur Otan» partiiasy filialy ǵimaratyna jinap jatqan kómekke óz úlesimdi qospaq boldym. Otbasymyzben aqyldasyp azyq-túlik ákeldik. Biz bir el bolyp, basyna is túsken turǵyndarǵa óz kómegimizdi berýimiz kerek, - deidi qala turǵyny Klara Mámbetova.
Eń kóp qarjyny «SNPS-Aqtóbemunaigaz» AQ aýdaryp otyr.
«Kompaniia basshysy issaparda júrgenine qaramastan qoldaý kórsetip jatyr. Syn saǵatta halyqqa kómek kórsetip, 50 million teńge aqsha aýdaryldy. Munai ken ornyndaǵy jumysshylar da jalaqylaryn aýdarady, túsindirý jumystary bastaldy. Arys qalasynyń turǵyndaryna bar jaqsylyqty tileimiz», - dedi «SNPS-Aqtóbemunaigaz» AQ bas direktorynyń orynbasary, «Nur Otan» partiiasy saiasi keńesiniń múshesi Tahtalifým Esenǵulov.
«Nur Otan» partiiasynyń oblystyq filialy bir kúndik jalaqylaryn aýdardy.
