Aqtóbe oblystyq Politsiia departamenti jol-kólik oqiǵasynyń videosyn jariialady. Tekserý kezinde júrgizýshi áieldiń mas kúide rýlge otyrǵany belgili boldy, dep habarlaidy QazAqparat.
Aqtóbede bolǵan jol-kólik oqiǵasy týraly jańa málimetter men video shyqty. Qyzyl tústi «Daewoo Nexia» avtokóliginiń júrgizýshisi burylysta rýlge ie bola almai, «Lada Priora» jáne «Opel Vectra» avtokólikterimen soqtyǵysqan. Oblystyq Politsiia departamenti jergilikti basqarý ortalyǵynyń beinebaqylaý kameralaryna túsken videony taratty.
«Soqqy saldarynan «Daewoo Nexia» avtokóligi órtenip ketken. Oqiǵa ornyna politsiia qyzmetkerleri men órt sóndirý qyzmeti kelgen. Oblystyq Politsiia departamenti Anyqtaý basqarmasy bastyǵynyń mindetin atqarýshy Elmira Sýlikanovanyń aitýynsha, 31 jastaǵy áiel «Daewoo Nexia» avtokóligin mas kúiinde júrgizgen. Jol-kólik oqiǵasy saldarynan «Daewoo Nexia» avtokóliginiń júrgizýshisi men jolaýshy jáne «Lada Priora» avtokóliginiń júrgizýshisi túrli jaraqattarmen Aqtóbe qalasynyń jedel meditsinalyq járdem aýrýhanasyna jetkizildi. «Daewoo Nexia» avtokóliginiń júrgizýshisi jansaqtaý bóliminde jatyr. Ózgesiniń jaǵdaiy qanaǵattanarlyq», - dep habarlady oblystyq PD baspasóz qyzmetiniń jetekshisi Erbolat Sarqulov.
