Biyl Aqtóbe qalasynda ekinshi ret «Baqytty bala» baiqaýy ótedi. Álemniń segiz elinen ónerpaz qatysyp, gala kontsertte Dimash Qudaibergen án shyrqaýy múmkin, dep habarlaidy QazAqparat tilshisi.
«Baqytty bala» baiqaýyna Ýkraina, Resei, Belorýs, Polsha, Ózbekstan, Qyrǵyzstan, Gretsiia, Moldova elinen ónerpazdar keldi. Kanada eliniń qatysýshysy qujat rásimdeýge keshigip, 2020 jyly bolatyn baiqaýǵa birinshi bolyp joldama alyp otyr.
«Biyl balalardyń vokaldyq konkýrsy ekinshi ret uiymdastyrylyp jatyr. Barlyǵy 500-den astam ótinish tússe, onyń jiyrmasa irikteldi. Gala kontsert 14-shilde kúni ótedi. Balalar óte talantty, daiyndyqpen kelgen. Bir aita keterligi, baiqaýdyń gala kontsertine Dimash keledi dep kútip otyrmyz. Álem juldyzynyń ýaqyty az, kestesi tyǵyz bolǵanymen úmit úzbeimiz. Kelse qýanamyz, amandyq bolsa qaýyshamyz», - dedi qala ákiminiń orynbasary Aigúl Arynǵazieva.
Baiqaýdy qalalyq ákimdiktiń qoldaýymen «Dimash Áli» prodiýsserlik ortalyǵy birge uiymdastyryp jatyr. Ádilqazylar arasynda Ýkrainanyń tanymal ánshisi Aida Nikolaichýk, Resei kompozitory Evgenii Evzerov, saýnd-prodiýser Erlan Bekchýrin, kompozitor ári oryndaýshy Ulyqpan Joldasov, Dimashtyń ustazy Marat Áitimov bar.
«Balalar Aqtóbede bir apta bolady. Olar osy arqyly dostasyp, kásibi damýǵa múmkindik alady. Bilikti ustazdar sheberlik sabaǵyn ótkizdi. Balalar aldymen ana tilinde, keiin álemdik hit ándi oryndaidy. Balalar qaiyrymdylyq sharaǵa da qatysyp, zamandastaryna kómektesedi, olardy óz konkýrsyna shaqyrdy. Múmkindigi shekteýli balalarmen kezdesý de erekshe ótedi dep josparlap otyrmyz», - dedi festival rejisseri Anna Oboianskaia.
Aita keteiik, vokaldyq baiqaýdyń júlde qory 2 million teńge. Bas júlde iegerine 1 million teńge beriledi. Sonymen qatar jergilikti ákimdik qatsýshylardy kútý jumystaryn óz mindetine aldy.
«Dimashtyń arnaiy syiy týraly konkýrs kezinde belgili bolady. Bas júlde ótken jyly eki qatysýshyǵa berildi. Biyl da baiqaý barysynda bári ózgerýi múmkin», - dedi Qanat Aitbaev.
Aqtóbe oblysynan Ańsar Júsip, Laýra Serkebaeva, Ádil Orynbasarov qatysady. Sonymen qatar baiqaýǵa qatysatyn Dimashty kórý úshin Túrkiia, Finliandiia, Frantsiia, Ulybritaniia, Bolgariiadan 12 fanaty keldi.
