Aqtóbede munai urlyǵy azaiar emes. Sońǵy 5 jylda 160 qylmystyq is tirkelip, 7 milliard teńgeden astam shyǵyn keltirilgen. Qazir «Saǵyz Petroliým Kompani» JShS aryzymen munai urlaǵan qylmystyq top tergelip jatyr. Bul týraly oblys prokýrorynyń birinshi orynbasary Nurdáýlet Súiindikov baspasóz máslihatynda aitty, dep habarlaidy QazAqparat tilshisi.
Aqtóbede munai urlyǵymen ainalysqan qylmystyq top ustaldy degen habardan soń birden Erkin Izbasarovtyń aty ataldy. Birinshi top múgedegi buryn «Aǵaiyndy tórteý» degen laqap atpen belgili bolǵan edi. Al búgin oblystyq prokýratýra birqatar ýákiletti, quqyq qorǵaý organdarynyń júieli jumysynan soń áli de «qara altyndy» tonaý deregi tyiylmaǵanyn habarlady. Prokýratýra zertteý jumysyn qolǵa alyp, oǵan quqyq qorǵaýshylardy, memlekettik kiris departamentiniń qyzmetkerleri men ekologtardy, geologtardy qosqan. «Esepke alýdy avtomattandyrý júiesin iske qosý talap etiledi. Biraq jekelegen kompaniialar áli de eski ádetterinen tyiylar emes. Shikizat uńǵymalardan ortalyqtandyrylǵan kollektorǵa emes, bólek turǵan bóshkelerge quiylady. Sodan soń, óndirilgen munai kólemi syzǵyshpen ólshenedi. Bul munaidyń bir bóligin jasyryp satýǵa múmkindik berip otyr. Naqty mysal. Qazir Vedomstvoaralyq tergeý tobymen «Saǵyz Petroleým Kompani» JShS-niń aryzy boiynsha qylmystyq is tergelip jatyr. Búgingi tańǵa bir ken ornynyń operatorlary, sheberleri men kúzetshileri túngi ýaqytta bóshkelerge óndirilgen munaidyń bir bóligin zańsyz quiyp, satyp otyrǵandary anyqtaldy. Osyndai tásilmen 530 tonna munai urlanǵany belgili boldy. Tergeý jumystary jalǵasýda», - dedi Aqtóbe oblystyq prokýrorynyń birinshi orynbasary Nurdáýlet Súiindikov.
Prokýratýranyń deregine súiensek, qaraýsyz qalǵan nemese óndirisi toqtap turǵan ken oryndarynan da munaidyń urlanǵany anyqtaldy. Sonymen qatar, keibir kompaniialar tehnologiialyq shyǵyndar men jeke qajettilikke dep munaidyń bir bóligin ózderine alyp qalyp, esepten shyǵaryp otyrǵan. «SNPS-Aqtóbemunaigaz» AQ-y 2014-2016 jyldary 88 myń tonna munaidy tehnologiialyq shyǵyndar retinde esepten shyǵarǵan. Bul kólemder keńes dáýirindegi normativtik qujattar negizinde anyqtaldy. «Saǵyz Petroleým Kompani» JShS-i osy jyldar ishinde 2 myń tonna munaidy uńǵymalardy ystyqtai jýyp shaiý úshin paidalanǵan. Mundai shyǵyndardy esepteýdiń naqty ádisteri joq. Bizdiń oiymyzsha, mundai jaǵdai «qara altyn» óndirýshi kompaniianyń jumysshylary urlanǵan shikizatty shyǵyn túrinde jasyryp qalýǵa múmkindik berip otyr», - dedi N. Súiindik.
Aita keteiik, sońǵy 5 jylda Aqtóbede munai urlyǵy boiynsha 160 qylmystyq is tirkelgen. Ótken jyly 39 derek anyqtaldy. Shyǵyn 7 milliard teńgege esepteldi.
