Aqtóbede quny 2,5 mlrd. teńge bolatyn jol salý, olardy kúrdeli jáne ortasha jóndeý jónindegi 19 joba júzege asyrylady. Bul týraly Aqtóbe oblysynyń Óńirlik kommýnikatsiialar qyzmetindegi baspasóz konferentsiiasy barysynda Aqtóbe qalasynyń ákimi Iliias Ispanov habarlady.
Onyń aitýynsha, 2018 jyly tutastai alǵanda 30 km-ge jýyq jol jóndelinip, kópirler men jol ústindegi jaiaý júrginshiler joldary salynady.
«Jumys kóleminiń úlkendigin, sondai-aq, obektilerdiń kúrdeliligin eskere otyryp, barlyq jumystar ádettegi merzimderden erte bastaldy. Teknika kóptegen obektilerge sáýirdiń aiaǵy men mamyrdyń basynda shyǵaryldy. 8 merdigerlik uiym tartyldy», - dedi Iliias Ispanov.
Oblys ortalyǵynda Týrgenev kóshesin Ǵ.Jubanova kóshesimen qosatyn avtojoldy qaita jaraqtandyrý jalǵastyrylýda. Jobada 5 yqsham aýdandaǵy jol ótpesi astynan týnnel ornatyp, osy aýdandaǵy avtokólik qozǵalysyn uiymdastyrýǵa ózgerister engizý qarastyrylǵan. Jalpy alǵanda, 5,7 km avtojoldy qaita jaraqtandyrý josparlanýda.
3 jol ústindegi jaiaý júrginshiler joldaryn salý jumystary da bastalyp ketti. Odan basqa, jol qozǵalysyn basqarýdyń avtomattandyrylǵan júiesin jańartý jumystary júrgizilýde, olardyń kómegimen qalanyń kóshe-jol jelisindegi kólik aǵyny men baǵdarsham nysandaryn retteý múmkindigi paida bolady. Qazirgi ýaqytta jol qozǵalysyn basqarýdyń avtomattandyrylǵan júiesine 87 baǵdarsham nysandarynyń 65-i nemese 75%-y qosyldy.
Iliias Ispanov onlain tártibinde Jol-kólik qozǵalysy buzýshylyqtaryn tirkeýge múmkindik beretin, avtokólik aǵynyn jáne tutastai alǵanda, qalanyń qaýipsizdigin baqylaýdy iske asyratyn «Smart siti» beine baqylaý júiesin ornatý josparlarymen de bólisti.
