Aqtóbe qalasy men óńir turǵyndary jergilikti seriktestik óndiretin jartylai fabrikat ónimin satyp alýdy jón sanaidy.
Kompaniia alǵashy kezde «Damý óndiris» baǵdarlamasy arqyly nesie rásimdep, kásibin jandandyrdy, dep habarlaidy "Ult aqparat".
Jartylai fabrikattar daiyndaityn seriktestik óz jumysyn 1998 jyly bastady. Alǵashynda shaǵyn tseh jumys istep, keiin zamanaýi apparattar satyp alyndy. Qazirgi kezde «Geba» JShS-niń ónimi tek oblysqa emes, elimizdiń ózge de óńirine jetkizilip jatyr. Sóitip 2019 jyly kompaniia óz qýaty artyp, táýligine 10 tonna ónim shyǵarý múmkindigine ie boldy.
«Qazaqstandyq ónimdi bizdiń seriktestikten tabýǵa bolady. Munda jartylai fabrikattyń 40 túri bar. Túshpara, tartylǵan et, kotlet sekildi et jáne et ónimderi esh qospasyz tutynýshyǵa jetkiziledi. Sondyqtan bolar, bizdiń ónim sapasyna senim artyp, satyp alatyndar qatary jyl ótken saiyn artyp keledi»,- dedi kompaniia direktory Janziia Kadirova.
Kompaniia «Damý óndiris» baǵdarlamasy arqyly nesie aldy. Bul qarjy ainalymǵa qoldanyldy.
«Seriktestikte 70 adam jumys isteidi. Naryqta óz orny bar, taýar sapasy básekege qabiletti. Kásipker memlekettik qarjyny tiimdi jumsap, óńir ekonomikasynyń damýyna úles qosyp otyr. Bul – jergilikti ónim. Óz taýarymyzdy qoldaý úshin tutynýshylar da jii satyp alady», - dedi «Damý» kásipkerlikti damytý qory» AQ AOF menedjeri Baýyrjan Darqulov.
Statistikaǵa súiensek, byltyr «Damý» qory arqyly 500-ge jýyq joba sýbsidiialandy. Nátijesinde ekinshi deńgeili bankter 18 milliard teńgege jýyq qarjy bólgen. Sonymen birge kepildik berilgen joba sany 500-den asady. Biyl birinshi toqsanda «Damý» qory oblys boiynsha 496 jobany sýbsidiialady. Quny - 8 milliard teńge. Sonymen birge 400-den astam jobaǵa kepildik berilgen.
