Foto: ashyq derekkóz
Aqtóbe oblysynda toǵyz ai boiy mektep oqýshysynyń júkti ekenin ańǵarmaǵandar jazalandy. Bilim salasyna jaýapty basshy jumystan qýylsa, aýdan ákiminen bastap, birneshe laýazymdy tulǵa qatań sógis alǵan, dep habarlaidy Ult.kz "KTK" arnasyna silteme jasap.
Aýdandyq aýrýhana basshysyn jáne 14 jastaǵy oqýshy bilim alǵan mektep direktoryn qyzmetten bosatý máselesi de qaralyp jatyr, deidi Astanaǵa kelip jyldyq esebin bergen Aqtóbe oblysynyń ákimi.
Oblystyq bilim basqarmasy men densaýlyq saqtaý basqarmasynyń basshylaryna da qatań sógis jariialanǵan.
Aita ketelik, bul oqiǵa bir ai buryn oblystaǵy aýyldardyń birinde bolǵan. 14 jastaǵy qyz mektepte júrip, ishi qatty aýyryp, dáriger shaqyrtqan. Teksergen kezde onyń tolǵaǵy ustap, bosanǵaly turǵany anyqtalǵan. Buǵan deiin oqýshy úsh ret meditsinalyq tekserýden ótkenimen, dárigerler onyń júkti ekenin baiqamaǵan.
Tergeý kezinde oqýshyǵa zorlyq kórsetken ájesiniń azamattyq nekedegi kúieýi bolyp shyqty. Qazir aiýandyqqa barǵan 64 jastaǵy zeinetker qamaýda otyr.
"Bizde birneshe qyzmetker jumystan bosatyldy. Aýdandyq bilim bólimi basshysynan bastap, osyǵan qatysty qyzmetkerlerge shara qoldandyq. Qyzmetkerlerdi jumystan shyǵaryp, osymen shektelmeimiz. Júieli túrde jumysyn qadaǵalaýymyz kerek", - deidi Aqtóbe oblysynyń ákimi Ashat Shaharov
