Aqtóbe oblysynda mektepke oramalmen keletin 340-tai oqýshy bar. Mektep formasy erejesin saqtaý úshin júrgizilgen tiisti sharalar nátijesinde 23 oqýshy hidjabty sheshken. Bul týraly Aqtóbe oblysynyń ákimi Berdibek Saparbaev OKQ-da ótken baspasóz máslihatynda málimdedi, dep xabarlaidy Baq.kz tilshisi.
«340-tai mektep oqýshysy oramalmen keledi. Qyrkúiekten bastap sheshkender sany 23-24. Ata-analyqtan aiyrýǵa quqyǵymyz joq. Qazaqstanda zań bar. BǴM bekitken mektep formasy bar. Mekteptiń ózinde de ereje bar. Balalardyń ózderi erejeni saqtaýy qajet. Ata-analar da balalaryna mektep erejesi men BǴM erejesin saqtaý keregin aitýy tiis», - dedi Berdibek Saparbaev.
Oblys ákimi eń birinshi bizdiń memleketimizdiń zańyna sai kiiný qajet ekenin aitady.
«Qandai kiim kiiý qajettigine qatysty BǴM-nyń erejesi bar, sol erejeni saqtaý kerek. Ekinshiden árbir mekteptiń óziniń ishki talaby, erejesi bar. Onda da balalalardyń mektepke qalai kelý keregi jazylǵan. Biraq ókinishke qarai, ásirese, mynaý din baǵytynda júrgen ata-analar balalaryna xidjab kigizedi. Ondai ata-analarmen bizdiń mamandar, teologtar jumys istep jatyr. Ásirese qyz balalar hidjabty sheshse, ári qarai jumysty jalǵastyramyz», - dep málimdedi Aqtóbe oblysynyń ákimi Berdibek Saparbaev.
Sonymen birge oblys ákimi balalarǵa ekpe jasaýda dál osyndai qiyndyq kezdesetinin atap ótti.
«Negizinen olar dini baǵytta, teris baǵytta júrgen ata-analardyń balalary. Biz qazir olardyń da ata-analarymen jumys istep jatyrmyz. Ekpeniń qandai paidasy bar ekenin túsindirip jatyrmyz. Ata-ana eń birinshi óziniń balasyn, onyń densaýlyǵyn oilaýy kerek», - dedi Berdibek Saparbaev.
Oblys ákimi sóz sońynda ata-analarmen jáne oqýshylarmen ári qarai jumys isteitinin, bul jumysqa mamandardy, sarapshylardy, teologtardy qosatynyn atap ótti. Mundai ata-analarmen jekelei ózi sóilespegenin, qajet bolsa sóilesetinin jetkizdi.
