Q.Jubanov atyndaǵy Aqtóbe óńirlik memlekettik ýniversitetiniń jastar isi jónindegi komitet tóraǵasy Narqozy Qartjan adamdarǵa kómektesýdiń tiimdi tásilderin usyndy, dep habarlaidy QazAqparat tilshisi.
Narqozy Qartjan elordada Prezident Qasym – Jomart Toqaevtyń qatysýymen ótken «Biz birgemiz» respýblikalyq front-keńsesiniń ashylýyna qatysyp, ózi qatarly muqtaj jandarǵa kómektesip júrgen otandastarymen oi bólisti. Jas jigit stýdenttik shaǵynda alǵash ret volonter bolýdy, onyń mán-maǵynasyn úirendi.
«Volonterler qatarynda júrgenime 5 jyldan asty. Eń aldymen «D.A.R» eriktiler klýbyna múshe bolyp, qazirgi Nur-Sultan qalasynda ótken dziýdodan halyqaralyq chempionatqa qatystym. Sol kezde bir ai boiy biliktilik arttyrý kýrsyna qatysyp, kómek kórsetý joldaryn úirendim. Aǵylshyn tili mamandyǵyn meńgergen soń kóbine aýdarmashynyń qyzmetin atqaryp júrmin. Dál sol kezde volonter qyzmetin túsinip, onyń damýy, róli, jumysy jaiyn uǵa bastadym. Aqtóbege oralǵan soń ózge qatarlastarymmen tájiribe bólisip, EXPO kórmesi, Almatydaǵy Ýniversiada, Aqtóbede ótken gir kóterýden álem chempionatynda erikti qyzmetin atqardym. Elimizde eriktilerdiń serpilis alǵany sáti – EXPO kórmesi. Halyqaralyq sharada Aqtóbeden 150 erikti baryp, qyzmet etti. Al 2018 jyly qarasha aiynda Bakýde úlken halyqaralyq forým boldy. TMD elderiniń volonterlik qozǵalys jetekshileri qatysqan jiynda Resei men Ázerbaijannan keiin Qazaqstan úshinshi orynnan kórindi. Bizde volonterlerdiń qyzmeti, mindeti bekigen, damyǵan. 2016 jyly qabyldanǵan zań kóp múmkindik beredi. Qazir erikti ol hobbi emes, negizgi jumysyma ainaldy», - dedi ol.
Qazir Aqtóbede 35 eriktiler toby bar. Volonterler sany 1500-den asty. Joǵalǵan adamdardy izdeý, qariialarǵa kómek kórsetý jaqsy jolǵa qoiylǵan. Tabiǵat janashyrlary da jaz boiy bulaq kózin ashyp, ózen-kólderdiń máselesin ótkir kóterdi. Ár salany qamtyǵan qamqorshylar endi birge jumys isteýdi, habar alyp, bailanys ornatýdy maqsat etip otyr.
«Aqtóbede volonterlerdiń jumysyn júieleý úshin qaýymdastyq qurylyp jatyr. Biz osy arqyly eriktilerdiń jumysyn, Aqtóbede atqarylǵan isti kórsetýdi maqsat etip otyrmyz. Eshkim qarsylyq bildirmedi. «Zello Izdeý», «Aqtóbe Dyshi», «Júrekten júrekke», «Aqtóbe qaiyrymdy jandar» toby túgel kelisip otyr. Ári statistikalyq ortalyq retinde jumys isteidi. Báseke bar, biraq bári ashyq, ádil. Ýniversitette «Praktik - 2020» atty akademiia ashyldy. Bir baǵyty – eriktiler mektebi. Eriktilik ol qaiyrymdylyq emes. Áleýmettik jaǵdaiy tómen, kópbalaly otbasylarǵa kómektesemiz, biraq arǵy jaǵyn oilamaimyz. Stýdentter bir kún jinalyp, azyq-túlik jetkizdi. Is munymen bitpeidi. Bir kúndik aktsiia, azyq-túlik, kiim-keshek jetkizý tiimsiz. Máselen, dál osylai únemi kómek kórsetken, keiin ol otbasy teledidar suratty. Balalar úshin qajet bolar degen oimen tehnikany apardy, keiin tońazytqysh qajet ekenin aitty. Úiine barǵanda tońazytqyshtyń jumys istep turǵanyn kórdik. Iaǵni, biz óz isimizben keide jatypisherlerdi kóbeitemiz, adamdardy masyldyqqa úiretemiz», - dedi Narqozy Qartjan.
Ol qaiyrymdy istiń qaitarymdy jolyn usyndy. Iaǵni, daiyn tamaq, daiyn kiim-keshek jetkizý qate. Az qamtylǵan, kópbalaly otbasylar múshelerin eńbekke aralastyryp, balalaryna bilim bergen jón.
«Adamdardyń áleýmettik jaǵdaiyn qalai túzeýge bolady? Máselen, men kásipker bolsam eńbekke qabiletti otbasy múshesin jumysqa ornalastyramyn. Oqýshynyń sabaqtan keiin de jumys isteýine múmkindik beremin. Kúnine 3-4 myń tóleýge bolady. Ózim aǵylshyn tilin bilemin. Balalarǵa til úiretý, bul da jaqsy is. Psihologiia mamandyǵyn meńgerip júrgen stýdentter kómektesse, ózderine tájiribe jinaidy, qoǵamǵa qol ushyn sozady. Mine, sondai baǵyttardy damytqanymyz abzal. Áleýmettik jaǵynan osal top ortaǵa qosylyp, óz betimen ómir súrýdi úirense, erikti eńbeginiń nátijeli bolǵany. Memleketten qarjy bólmei, bir-birimizdi demep, damý jolyna tússek, utqanymyz», - dedi ol.
.jpeg)