Aqtóbe oblystyq ishki ister departamentiniń kriminaldyq politsiia men ekstremizmge qarsy is-qimyl basqarmasy qaraqshylyq shabýyl jasap, eki jábirlenýshini zorlaǵan 1980 jáne 1982 jyly týǵan dástúrli emes teris dini aǵym ókilderin ustady, - dep habarlaidy "Ult aqparat" Aqtóbe oblysynyń IID-niń baspasóz qyzmetine silteme jasap.
Ustalǵandar buryn sottalǵan azamattar. Dindi jamylyp, esirtki qoldanyp, qylmystyq is áreketpen ainalysqandar.
"2017 jyldyń 11 sáýirinde Ábilqaiyr han dańǵyly boiyndaǵy úilerdiń páterleriniń birinde kúsh qoldaný arqyly 1991 jáne 1996 jyly týylǵan qyzdarǵa qaraqshylyq shabýyl jasap, olardyń 300 myń tengege baǵalanatyn zattaryn iemdengen. Óltiremiz dep qorqytyp, qyzdarǵa zorlyq jasaǵan", - deidi baspasóz qyzmetiniń ókilderi.
Osy jaitqa bailanysty Aqtóbe qalalyq ishki ister basqarmasy QR Qylmystyq kodeksiniń birneshe baptary: 192-baby, 2-bóligi ("Qaraqshylyq, qarýmen tonaý"), 120-baby 2-bóligi (zorlaý, óltirý qaterin tóndirýmen ulasqan jáne 121-baby 3-bóligi ("zorlyq-zombylyq áreketter") boiynsha qylmystyq is qozǵady.
"Politsiia qyzmetkerleri osy aýyr qylmystyń "izin sýytpai" ashyp, qylmyskerlerdi qolǵa túsirdi. Qazir olar qamaýǵa alyndy. Kóp uzamai sot aldynda jaýapkershilikke tartylatyn bolady. Olar jasaǵan qylmystary úshin 5 jyldan 10 jylǵa deiin bas bostandyqtarynan aiyrylýy múmkin" - delingen baspasóz habarlamasynda.
Aqtóbe oblysynda politsiia qyzmetkerleri ústimizdegi jyly dástúrli emes teris 19 dini aǵym ókilderiniń 25 jalpy qylmystyq isterge qatysy baryn anyqtaǵan. Olar urlyq, uryp-tonaý, qaraqshylyq shabýyl jasaý, qorǵansyz áielderge qatysty ádepsiz jynystyq zombylyq áreketter jasaý jáne beibit turǵyndarǵa qarsy zańsyz qarý operatsiialary úshin qylmystyq jaýapkershilikke tartylǵan. Aqtóbe oblysynda taǵy bir jait dástúrli emes teris dini aǵym ókilderiniń meshitterde urlyq jasaǵanyna qatysty sot úkimderi de shyqty.
