Aqtóbede taǵy bir adam dertinen aiyǵyp shyqty. Ol Aqtaý arqyly Túrkiiadan kelgen bolatyn, dep habarlaidy "Ult aqparat".
Aqtóbe oblysy boiynsha barlyǵy 11 adamnan koronavirýs infektsiiasy anyqtalǵan bolatyn. Onyń bireýi ótken aptada aýrýhanadan shyqty. Búgin taǵy bir naýqas dertinen aiyqty.
«Túrkiiadan kelgen qala turǵynynan sońǵy eki táýlikte eki ret analiz alynyp, virýs anyqtalmady. Búgin 16 táýlik boldy. Em nátije berdi. Shaǵym joq, dene qyzýy qalypty. Ári qarai ambýlatorlyq baqylaýda, úidegi karantinde bolady. Dárigerler áli eki apta baqylaýdy jalǵastyrady. Qazir 9 naýqas em qabyldap jatyr. Onyń ekeýiniń jaǵdaiy ortasha aýyr, ózgesiniń densaýlyǵy qanaǵattanarlyq», - dedi oblystyq densaýlyq saqtaý basqarmasynyń basshysy Áset Qaliev.
Óńirde infektsiialyq, prozizorlyq jáne karantindik gospitalde 270 turǵyn oqshaýlanǵan. Onyń 40-y infektsiialyq gospitalde jatyr.
Aita keteiik, úidegi karantinde 1800-den astam adam bar. Olardyń barlyǵy ekspress test Aqtóbege jetkizilgende tekseriledi.
«Qujat rásimdeý kezinde kedergiler bolyp, ekspress test Qorǵas shekara beketinde qalyp qoidy. Birer kúnde jetkizilip, aldymen úidegi karantinde jatqan adamdardan synama alynady. Eger virýs belgisi anyqtalmasa, tizimnen syzylady. Al eger nátijesi kúdik týǵyzsa, zerthanalyq tekserýge jiberiledi. Bizde ulttyq saraptama ortalyǵy men obaǵa qarsy stantsiiada laboratoriia bar. Infektsiialyq aýrýhanadaǵy zerthana jóndelip, taiaýda iske qosylady. Barlyǵy táýligine 400 adamnan alynǵan synamany zertteýge múmkindik beredi», - dedi Áset Qaliev.
