Aqtóbede stýdentter tóbelesip, 19 jastaǵy jigit aýrýhanaǵa tústi, dep habarlaidy "Ult aqparat".
Stýdentter arasyndaǵy tóbeles 5 aqpan kúni boldy. Oqiǵa Q.Jubanov ýniversitetiniń jataqhanasynyń mańynda tirkelgen.
«Jedel is-shara kezinde politsiia tóbeleske qatysqandardy anyqtap, ustady. Qazir pyshaq salǵan kúdiktiniń jeke basy anyqtalyp jatyr. Ustaý sharalary qolǵa alyndy. Osy derek boiynsha Qylmystyq kodekstiń «Adam óltirýge oqtalý» babymen is qozǵaldy, tergeý bastaldy. Politsiia jataqhana men jaldamaly páterde turatyn stýdentterdiń ata-analaryn balany baqylaýda ustaýǵa shaqyrady», - dedi oblystyq PD baspasóz qyzmetiniń jetekshisi Erbolat Sarqulov.
Ýniversitettiń jastar saiasaty áleýmettik máseleler departamentiniń direktory Qarlyǵash Satybaldinanyń aitýynsha, jaralanǵan taý-ken isi mamandyǵynyń 2 kýrs stýdenti.
«Dárigerlermen sóilesip otyrmyz. Kim pyshaqtaǵanyn bilmeimiz. Oqiǵa kópqabatty úidiń janynda bolǵan», - dedi Qarlyǵash Satybaldina.
Aita keteiik, pyshaq jaraqatyn alǵan stýdentke ota jasaldy.
«Keshe jedel járdem aýrýhanasyna 19 jastaǵy jas jigit ákelindi. Ol jarty saǵat buryn tanymaityn adamdar pyshaq jaraqatyn salǵanyn aitty. Keýde qýysy, sol jaq aiaǵy zaqymdanǵan. Túsken kezde jaǵdaiy aýyr boldy. Bir saǵattan soń operatsiia jasaldy. Sol jaq keýde qýysynyń kesilip, tesilgen, ókpe jaraqaty anyqtaldy. Ókpesi tigildi. 500-600 ml qan ketken. Aldymen jansaqtaý bóliminde bolyp, keiin palataǵa aýystyryldy. Qazir ómirine qaýip tónip turǵan joq», - dedi oblystyq jedel járdem aýrýhanasynyń bas dárigeri Sáken Qapanov.
