Aqtóbede Ekinshi dúniejúzilik soǵysqa qatysqan 8 ardager bar. Olardyń árqaisysyna 2 million teńgeden birjolǵy tólem beriledi, dep habarlaidy QazAqparat.
Aqtóbe oblysynda 1 mamyr Qazaqstan halqynyń birligi kúni, 7 mamyr Otan qorǵaýshylar kúni jáne 9 mamyr Jeńis kúni merekelik-tanymdyq sharalar ótedi.
Qala men aýdandardaǵy ortalyq saiabaqtarda, mádeniet úilerinde jergilikti ónerpazdar óz baǵdarlamalaryn usynady.
Al 9 mamyr kúni ardagerlerge qurmet kórsetiledi.
«Soǵys ardagerleri úshin materialdyq kótermeleý retinde 2 million teńge mólsherinde birjolǵy tólem uiymdastyrylady. Qazirgi tańda oblysta 8 soǵys ardageri bar. Olardyń altaýy Aqtóbe qalasynda, ekeýi Muǵaljar jáne Hromtaý aýdandarynda. Al Ekinshi dúniejúzilik soǵys qatysýshylaryna teńestirilgender sany – 1933. Olarǵa tólenetin birjolǵy kómek ár qaisysyna 50 000-100 000 teńgeni quraidy. Sonymen qatar, tyl ardagerlerine, iaǵni, 1941 jylǵy 22 maýsym – 1945 jylǵy 9 mamyr aralyǵynda keminde alty ai jumys istegen adamdarǵa 50 000 teńge beriledi. Nátijesinde oblys boiynsha 5415 adam 378,7 mln teńge birrettik tólemmen qamtylady», - dedi Aqtóbe oblystyq ishki saiasat basqarmasynyń basshysy Lázzat Orazbaeva.
Aita keteiik, ardagerler turatyn úidiń aýlalarynda kontserttik sharalar uiymdastyrylady.
Soǵys ardagerleri men qan maidanda qaza tapqan jaýyngerlerdiń ata-analary men jesirlerine, tyl eńbekkerlerine qurmet kórsetilip, eriktiler járdem kórsetedi.
«Beibit kún jasasyn álemde!» atty merekelik shara barlyq saiabaqta ótedi.
«Jeńis kúni «Jaýjúrek polk» sherýi ótpeidi. Shara formaty ózgerip, Aqparat jáne qoǵamdyq damý ministrliginiń bastamasymen «Jaýjúrek polk» platformasynda jáne áleýmettik jelilerdegi akkaýnttarda onlain túrinde uiymdastyrylady. Munda aktsiiaǵa qatysýshylardyń biryńǵai deregi jinalyp, qazaqstandyq soǵys ardagerleriniń tarihi anyqtamalyqtary jasalady. Kez kelgen adam qolda bar aqparatty qaldyryp, keiin sol málimetti qoldanýǵa múmkindik alady», - dedi Lázzat Orazbaeva.
