Aqtóbede ekologtar shoshqa fermasynyń jumysynan birneshe zańsyzdyqty anyqtap, aiyppul saldy. Bul týraly óńirlik kommýnikatsiialar qyzmetinde oblystyq ekologiia departamentiniń basshysy Nurjan Aqqul málimdedi, dep habarlaidy "Ult aqparat".
Aqtóbe oblysy Alǵa aýdany Bestamaq aýylyndaǵy shoshqa fermasyna qatysty tekserý jumysynyń qorytyndysy shyǵaryldy.
Tekserý barysynda soiylǵan maldyń ishek-qaryn, óleksesi, qatty turmystyq qaldyqtary, qurylys jáne aýyl sharýashylyǵy qaldyqtary júieli túrde shuńqyrǵa kómilgen.
Tekserý barysynda búlingen jer kólemi anyqtalyp, shyǵyn kólemi 14,2 mln teńge dep esepteldi. Sonymen birge qylmystyq is qozǵaldy.
«Sonymen birge tekserý kezinde 2018-2019 jyldary aralyǵynda sharýashylyqta qorshaǵan ortany qorǵaý zańdylyǵy saqtalmaǵany belgili boldy. Mal basynyń sany negizsiz ósken. Joba boiynsha 40 myń bas, al shyn máninde 50 myń bastan astam shoshqa baqqan. Aǵyndy sý Baibaqty ózeniniń arnasyn lastaǵan. Seriktestik Ekologiia kodeksin saqtamai, Ákimshilik quqyq buzý kodeksi boiynsha úsh is qozǵaldy. Barlyǵy 7 milliard teńgeden astam shyǵyn eseptelip, aiyppul salyndy. Kásipker zań boiynsha 1 aida tóleýi tiis. Eger tólemese, bul is te sotqa joldanady», - dedi oblystyq ekologiia departamentiniń basshysy Nurjan Aqqul.
Nusqama merziminde oryndalmasa, kásiporynnyń sharýashylyq qyzmetin ýaqytsha toqtatý týraly sotqa talap-aryz joldanady.
