Shóbi órtengen Aqtóbe oblysy, Qosestek aýylynyń turǵyndaryna 100 myń teńgeden materialdyq kómek kórsetildi. Al aýyldyń shóbin órtep júrgen kúdikti áli anyqtalǵan joq, dep habarlaidy QazAqparat tilshisi.
Aqtóbe oblysy, Qarǵaly aýdanyna qarasty Qosestek aýylynyń turǵyndary áli úrei ústinde otyr. Buǵan deiin habarlaǵanymyzdai, sońǵy kúnderi belgisiz bireýler eldiń shóbin órtep júr. Keibirine «kezek sende» degen hat ta qaldyryp ketedi eken. Qaskóiler bank kartochkasyna 50 myń teńge aýdarýdy talap etedi. Qazir aýyldy qaraýyldaýǵa politsiia, tótenshe jaǵdailar qyzmeti tartylǵan.
Búgin Óńirlik kommýnikatsiialar qyzmetinen habarlaǵandai, arnaiy qurylǵan komissiia zardap shekken otbasylarǵa 100 myń teńgeden kómek kórsetýde. Al qaiyrymdy jandar azyq-túlik jetkizip jatyr.
«Órt oqiǵalary boiynsha qylmystyq is qozǵaldy. Tergeý jumystaryn arnaiy top júrgizip jatyr. Top quramyna Aqtóbe oblysynyń prokýratýra jáne politsiia departamentiniń qyzmetkerleri kirdi. Zardap shekkenderge naqty kómek kórsetý úshin jáne shyǵyndy anyqtaý maqsatynda aýdandyq máslihat, «Nur Otan» partiiasynyń aýdandyq filialy men jergilikti bilik ókilderinen qurylǵan komissiia jasaqtaldy. Komissiia quramy órtten zardap shekkendermen kezdesip, ár otbasyǵa kómek retinde 100 myń teńgeden tabys etti. Demeýshilerdiń kómegimen ár otbasyǵa azyq-túlik jetkizildi. Qazirgi ýaqytta aýylda 50 politsiia qyzmetkeri, tótenshe jaǵdailar bólimi jáne jergilikti turǵyndardyń kúshimen táýlik boiyna kezekshilik uiymdastyryldy», - dep habarlady Óńirlik kommýnikatsiialar qyzmetinen.
Al Aqtóbe oblystyq Politsiia departamentiniń baspasóz qyzmetinen málim etkendei, kúdikti áli ustalǵan joq.
Atap ótilgendei, búgingi kúni 700 úii bar Qosestek aýyldyq okrýgindegi jaǵdai turaqty. Órtke qatysty másele oblys basshylyǵynyń baqylaýyna alyndy. Sonymen qatar, jergilikti atqarýshy organdar men politsiia qyzmetkerleri qylmysty ashýǵa baǵyttalǵan sharalar keshenin júrgizýde.
