Aqtóbede shekteý sharasy jeńildedi. Budan bylai saýda oryndary, bazarlar demalys kúnderi ishki tártip boiynsha jumys isteidi, dep habarlaidy oblystyq sanitarlyq-epidemiologiialyq baqylaý departamentiniń baspasóz qyzmeti.
Aqtóbe oblysynda áli de túrli konferentsiia, kórme, forým, oiyn- saýyq, sporttyq jarystar ótkizýge, sondai-aq adamdar kóp jinalatyn otbasylyq, saltanatty, estelik jáne basqa da is-sharalardy uiymdastyrýǵa tyiym salynǵan. Jabyq alańdaǵy balalar oiyn alańdary, karaoke, biliard, kompiýterlik klýbtar jumys istemeidi. Mektepterdegi ashana da qyzmet kórsetpeidi. Degenmen keibir shekteý sharasy jeńildedi. Saýda oryndary, bazarlar jumys jáne demalys kúnderi ishki tártipke sáikes qyzmet kórsetedi. Buǵan deiin jeksenbi jáne mereke kúnderi saǵat 17:00-ge deiin qyzmet kórsetken bolatyn.
«Sulýlyq salondary, shashtaraz, SPA ortalyqtary jáne kosmetologiialyq qyzmet kórsetetin obektiler dál osyndai tártip boiynsha jumys isteidi. Jabyq sport nysandarynda 5 adamnan aspaityn jeke jáne toptyq jattyǵý júrgizýge ruqsat. Monsha, saýna, basseinge de jazylyp, araqashyqtyqty saqtap, jumys jáne demalys kúnderi barýǵa bolady. Mektepke deiingi mekemelerdegi kezekshi top balalarynyń sany 20-dan aspaýy tiis», - delingen habarlamada.
Sonymen birge ashyq alańdaǵy attraktsiondar jumys isteidi. Ári Qazaqstan Respýblikasynyń chempionattaryn jáne respýblikalyq jarystardy kórermenderdiń qatysýynsyz ótkizýge bolady. Tek bir mezgilde qatysýshylar sany 100 adamnan aspaýy tiis. Oqý-jattyǵý jiyndarynda adam sany 30-dan aspaýy kerek.
