Bir jylǵa jýyq ýaqyt boiy ginekologiia kabinetinde em qabyldaǵan Gúldana Nurmaǵambetova operatsiia ústelinde kóz jumdy, dep habarlaidy QazAqparat.
Aidos pen Gúldana Nurmaǵambetovter 1 jyldan astam ýaqyt buryn otaý quryp, balaly bolýdy armandady. Gúldana Nurmaǵambetova 8 ai boiy ginekologiialyq aýrýlarǵa bailanysty jeke klinikada em qabyldaǵan. Sońǵy emi kezinde dárini qatty aýyrsynyp, operatsiia ústelinde kóz jumdy.
«Eń jaqsy emdeý ornyna kelip, bala úshin aqsha aiamaǵan edik. Sol kúni oǵan jambasyna ekpe jasady. Dárigerler allergiialyq keri áseri bar ma, joq pa dep suramady, aqyldaspady. Ota kabinetine kirgen soń qatty aiqailap, men kúdiktene bastadym. Sol kezde ol esinen aiyrylyp qaldy. Biri dárige keri áseri bar dep, ekinshisi júregi toqtap qalǵan dep aitty. Kóz aldymyzda saý adamnan aiyrylyp qaldyq. Meni eki saǵat boiy «bári jaqsy» dep janyna kirgizbedi», - deidi kúieýi Aidos Nurmaǵambetov.
Onyń aitýynsha, jedel járdem 40 minýttan soń kelgen.
«Otaǵa 4:30-da alyp ketti, men 6:30-da ǵana kirdim. Sol kezde murny men qulaǵynan qan ketken, kelinshegimniń denesi sýyp qalǵan. Deni saý adam dárigerler janynda kóz jumdy. Men qylmystyq jaýapkershilikke tartylyp, jazalanǵanyn qalaimyn. Mundai jaǵdai basqa otbasynda qaitalanbaýy tiis. Sotqa aryz jazamyn. Keshirim surady, biraq jaýap berýi tiis. Kelinshegim Gúldana aqjarqyn, kóńildi adam edi. Ol - 20 jastaǵy perishte. Armanymyz, maqsatymyz kóp boldy. Ol 5 minýttan soń kelemin dep kúlip ketti», - deidi Aidos Nurmaǵambetov.
Oqiǵa bolǵan «Áliia» meditsinalyq ortalyǵynyń basshysy Áliia Shangaraeva oqiǵa bolǵanyn, politsiia tergeý júrgizip jatqanyn rastady.
«Qaiǵyly jaǵdai boldy. Jas kelinshek kóz jumǵan soń oblystyq densaýlyq saqtaý basqarmasy, oblystyq politsiia departamenti tergeýdi bastady. Komissiianyń qorytyndysyn aitpai qandai da bir aqparat bere almaimyn. Aldyn ala belgili bolǵany emdelýshi dáriden anafilaktikalyq shok alǵan. Jas kelinshek buryn da osy emdeý ortalyǵyna qaraldy. Buryn allergiialyq keri áseri tirkelmedi», - dedi Áliia Shangaraeva.
