Aqtóbe oblysy, Yrǵyz aýdanynyń turǵyny A.Sqaqov mas kúiinde politsiia qyzmetkerlerine ustalyp qalǵan. 29 jastaǵy esepshi ózin ustaǵan politseidi balaǵattap, keiin betine túkirip jibergeni úshin jazalandy, dep habarlaidy QazAqparat tilshisi.
Aqtóbeniń Yrǵyz aýdandyq sotynda aiytalýshy A.Sqaqovqa qatysty qylmystyq is qaraldy. Aýdandyq óner mektebiniń esepshisine Qylmystyq kodekstiń «Bilik ókilin qorlaý» baby boiynsha aiyp taǵyldy. Is materialyna súiensek, 2018 jyldyń maýsym aiynda aiyptalýshy kóshede mas kúiinde júrip, politsiia qyzmetkerlerine ustalady. Sol kezde politseiler 29 jastaǵy esepshiniń ishimdik ishkenin anyqtaý úshin ony aýdandyq aýrýhanaǵa jetkizedi. Tekseristen soń Ishki ister bólimine kirer kezde aiyptalýshy A.Sqaqov qyzmettik mindetin atqaryp turǵan politsiia qyzmetkerlerin balaǵattap, betine túkirip jibergen.
Sot otyrysynda A.Sqaqov ózine taǵylǵan aiypty tolyq moiyndap, bilik ókiliniń óz qyzmettik mindetin atqarý kezinde balaǵattap, qorlaý sózderin aitqanyn rastap, is-áreketine shyn júrekten ókinetinin, kinásin tolyq moiyndaitynyn, endi qaitalamaitynyn kórsetip, sottan jeńil jaza taǵaiyndaýdy surady. Al meditsinalyq tekserý qorytyndysy kezinde aiyptalýshynyń ishimdik iship, marihýana shekkendigi anyqtaldy.
«A.Sqaqov Qylmystyq kodekstiń «Bilik ókilin qorlaý» baby boiynsha kináli dep tanylyp, jaza retinde 35 ailyq eseptik kórsetkish mólsherinde, iaǵni, 84 175 teńge aiyppul salynsyn. A.Sqaqov sot úkimi zańdy kúshine engen kúnnen bastap bir ai ishinde aiyppuldy tóleýge mindetti», - dedi sýdia S.Mahambetov.
