Aqtóbe oblystyq politsiia departamentiniń bastyǵy Atyǵai Arystanov pnevmoniiadan kóz jumǵan qyzmetkerlerdiń otbasymen kezdesti, dep habarlaidy "Ult aqparat" oblystyq PD baspasóz qyzmetine silteme jasap.
Atyǵai Arystanov aldymen 4 shilde kúni koronavirýs pnevmoniiasynan qaitys bolǵan Hromtaý aýdandyq politsiia bóliminiń ýchaskelik politsiia inspektory Aibat Ábievtiń otbasyna bardy. Qyzmettik boryshyn úlgili atqarǵany, karantin ýaqytynda zańdylyq pen quqyq tártibin qamtamasyz etý kezinde kórsetken erligi men janqiiarlyǵy úshin IIM E.Turǵymbaevtyń atynan batyrdyń otbasyna «Quqyq tártibin qamtamasyz etýge qosqan úlesi úshin» medalin tabystady.
Sonymen birge oblystyń bas politseii pandemiia ýaqytynda qyzmettik mindetterin atqarý kezinde qaza tapqan Hromtaý aýdanyq PB bastyǵy Marat Beketaevtyń otbasyna bardy. M. Beketaev 25 maýsym kúni jumys ornynan aýrýhanaǵa jatqyzylyp, oǵan koronavirýs pnevmoniiasy diagnozy qoiyldy. Alaida ol 1 shilde kúni kóz jumdy.
Memleket basshysynyń Jarlyǵymen politsiia polkovnigi Murat Beketaev «Erligi úshin» medalimen marapattaldy. Tártip saqshylary batyrlardyń jubailary men ata-analaryna qurmet bildirip, gúl men syilyq tabys etti.
«Biz Qazaqstan Respýblikasy azamattarynyń tynysh ómiri úshin óz ómirlerin qiǵan árbir qaza bolǵan politsiia qyzmetkeriniń beinesin, igi isteri men erlikterin esimizde, júregimizde máńgi saqtaimyz. Olardyń árbir batyrlyǵy men is-áreketi erlik dep baǵalanady», – dedi Aqtóbe oblystyq politsiia departamentiniń bastyǵy Atyǵai Arystanov.
