اقتٶبە وبلىستىق پوليتسييا دەپارتامەنتٸنٸڭ باستىعى اتىعاي ارىستانوۆ پنەۆمونييادان كٶز جۇمعان قىزمەتكەرلەردٸڭ وتباسىمەن كەزدەستٸ, دەپ حابارلايدى "ۇلت اقپارات" وبلىستىق پد باسپاسٶز قىزمەتٸنە سٸلتەمە جاساپ.
اتىعاي ارىستانوۆ الدىمەن 4 شٸلدە كٷنٸ كوروناۆيرۋس پنەۆمونيياسىنان قايتىس بولعان حرومتاۋ اۋداندىق پوليتسييا بٶلٸمٸنٸڭ ۋچاسكەلٸك پوليتسييا ينسپەكتورى ايبات ەبيەۆتٸڭ وتباسىنا باردى. قىزمەتتٸك بورىشىن ٷلگٸلٸ اتقارعانى, كارانتين ۋاقىتىندا زاڭدىلىق پەن قۇقىق تەرتٸبٸن قامتاماسىز ەتۋ كەزٸندە كٶرسەتكەن ەرلٸگٸ مەن جانقييارلىعى ٷشٸن ٸٸم ە.تۇرعىمباەۆتىڭ اتىنان باتىردىڭ وتباسىنا «قۇقىق تەرتٸبٸن قامتاماسىز ەتۋگە قوسقان ٷلەسٸ ٷشٸن» مەدالٸن تابىستادى.
سونىمەن بٸرگە وبلىستىڭ باس پوليتسەيٸ پاندەمييا ۋاقىتىندا قىزمەتتٸك مٸندەتتەرٸن اتقارۋ كەزٸندە قازا تاپقان حرومتاۋ اۋدانىق پب باستىعى مارات بەكەتاەۆتىڭ وتباسىنا باردى. م. بەكەتاەۆ 25 ماۋسىم كٷنٸ جۇمىس ورنىنان اۋرۋحاناعا جاتقىزىلىپ, وعان كوروناۆيرۋس پنەۆمونيياسى دياگنوزى قويىلدى. الايدا ول 1 شٸلدە كٷنٸ كٶز جۇمدى.
مەملەكەت باسشىسىنىڭ جارلىعىمەن پوليتسييا پولكوۆنيگٸ مۇرات بەكەتاەۆ «ەرلٸگٸ ٷشٸن» مەدالٸمەن ماراپاتتالدى. تەرتٸپ ساقشىلارى باتىرلاردىڭ جۇبايلارى مەن اتا-انالارىنا قۇرمەت بٸلدٸرٸپ, گٷل مەن سىيلىق تابىس ەتتٸ.
«بٸز قازاقستان رەسپۋبليكاسى ازاماتتارىنىڭ تىنىش ٶمٸرٸ ٷشٸن ٶز ٶمٸرلەرٸن قيعان ەربٸر قازا بولعان پوليتسييا قىزمەتكەرٸنٸڭ بەينەسٸن, يگٸ ٸستەرٸ مەن ەرلٸكتەرٸن ەسٸمٸزدە, جٷرەگٸمٸزدە مەڭگٸ ساقتايمىز. ولاردىڭ ەربٸر باتىرلىعى مەن ٸس-ەرەكەتٸ ەرلٸك دەپ باعالانادى», – دەدٸ اقتٶبە وبلىستىق پوليتسييا دەپارتامەنتٸنٸڭ باستىعى اتىعاي ارىستانوۆ.
