Aqtóbede Pfizer vaktsinasyn saqtaý úshin arnaiy tońazytqyshtar satyp alynady, dep habarlaidy QazAqparat.
Aqtóbede bir táýlikte taǵy 46 adamnan koronavirýs infektsiiasy anyqtaldy. Onyń kóbi virýstyń simptomdy túrine shaldyqqan. Qazir Aqtóbe oblysy boiynsha infektsiialyq statsionarlarda 250-den astam adam jatyr. Onyń 28-i jansaqtaý bólimine túsken.
«Qazir 23 naýqas ókpeni jasandy jeldetý apparatyna qosýly. Balalarǵa keler bolsaq, 48-inen virýs anyqtalyp, onyń úsheýi aýrýhanaǵa jatqyzyldy. Sonymen birge 20 júkti kelinshek te aýrýhanada em alyp jatyr. Oblys boiynsha infektsiialyq kereýetter júktemesi azaidy. Qazir 38,2% otyr. Jansaqtaý bóliminde júkteme – 30,1%», - dedi Aqtóbe oblysynyń densaýlyq saqtaý basqarmasy emdeý aldyn alý, qoǵamdyq densaýlyq saqtaý jáne dári-dármekpen qamtamasyz etý bóliminiń bas mamany Ásiia Tirijanova.
Jalpy COVID-19 juqtyryp, jazylǵandardyń 52-i qaita aýyryp qalǵan. Olardyń kóbi sozylmaly aýrýǵa shaldyqqan jasy 60-tan asqan adamdar. ńirlik kommýnikatsiia qyzmetinde ótken baspasóz máslihatynda vaktsinatsiialaý týraly aityldy. Búginge deiin oblysta 331 myńnan astam adam birinshi, 301 myńy eki komponentin de saldyrdy.
Qarasha aiynda Pfizer vaktsinasy jetkiziledi. Shamamen 46 myńnan astam bala men 4 myń júkti kelinshek immýndaýǵa jatady. Talap boiynsha -80°C saqtalýy tiis vaktsina qan ortalyǵyna jetkiziledi dep aitylǵan.
Degenmen jańa qural-jabdyq satyp alynatyny belgili boldy.
«Vaktsinany saqtaýǵa jańa muzdatqysh satyp alynady. Ol vaktsina salatyn emdeý mekemelerinde bolady. Qan ortalyǵynda saqtalmaidy», - dedi Ásiia Tirijanova.
