Túrkistan oblysy Saryaǵash aýdandyq soty Aqtóbe oblysynda ótken jyly qańtarda órtengen jolaýshylar avtobýsynyń iesi Ordýhan Mehtievti úsh jylǵa sottady. Bul týraly 13 tamyzda oblystyq sottyń baspasóz qyzmeti habarlady. 2018 jyly qysta bolǵan órtten avtobýs salonynda otyrǵan 52 ózbek azamaty mert bolǵan edi.
Túrkistan oblystyq soty baspasóz qyzmetiniń málimetinshe, Saryaǵash soty jábirlenýshilerdiń talap aryzdaryn ishinara qanaǵattandyrǵan. Sot Tashkent turǵyny, Qazaqstan azamaty 46 jastaǵy Mehtievti Qylmystyq kodekiniń "Kólik quraldaryn sapasyz jóndeý nemese olardy tehnikalyq aqaýlarymen paidalanýǵa shyǵarý" baby boiynsha kináli dep, úsh jylǵa bas bostandyǵynan aiyrýǵa úkim etti. Sottalýshy jazasyn qylmystyq-atqarý júiesiniń qaýipsizdigi barynsha tómen mekemesinde óteý belgilengen. Úkim kúshine engen joq, taraptardyń apelliatsiialyq shaǵym túsirýge quqyǵy bar. Bul is boiynsha sot 24 sáýirde bastalǵan edi.
Sotta Mehtiev ózine taǵylǵan aiyppen kelispeitinin, kinásin moiyndamaitynyn aitqan.
Ordýhan Mehtiev 2018 jyly 20 qarashada Tashkenttiń Sergeli aýdanynda ustalyp, 26 jeltoqsanda Qazaqstanǵa ekstraditsiialanǵan.
2018 jyly 18 qańtarda Aqtóbe oblysynyń Yrǵyz aýdany Qalybai aýylynan 10 kilometr qashyqta Shymkent - Samara jolynda jolaýshylar avtobýsy órtengen. Bilik oryndarynyń habarlaýynsha, avtobýsta barlyǵy 57 adam bolǵan, olardyń 52-si qaza bolǵan. Qurban bolǵandardyń barlyǵy – Ózbekstan azamaty. Eki jolaýshy men úsh júrgizýshi aman qalǵan.
Keiin Aqtóbede qylmystyq is qozǵalyp, bes adam qamalǵan. Aman qalǵan úsh júrgizýshi biyl qarasha aiynda bes jylǵa, avtobýsty jalǵa alǵan "Aziia tranzit servis" kompaniiasynyń quryltaishysy men avtobýs mehanigi úsh jarym jylǵa sottalǵan. Aiyptalýshylar taǵylǵan aiyptardy moiyndamaǵan.
