تٷركٸستان وبلىسى سارىاعاش اۋداندىق سوتى اقتٶبە وبلىسىندا ٶتكەن جىلى قاڭتاردا ٶرتەنگەن جولاۋشىلار اۆتوبۋسىنىڭ يەسٸ وردۋحان مەحتيەۆتٸ ٷش جىلعا سوتتادى. بۇل تۋرالى 13 تامىزدا وبلىستىق سوتتىڭ باسپاسٶز قىزمەتٸ حابارلادى. 2018 جىلى قىستا بولعان ٶرتتەن اۆتوبۋس سالونىندا وتىرعان 52 ٶزبەك ازاماتى مەرت بولعان ەدٸ.
تٷركٸستان وبلىستىق سوتى باسپاسٶز قىزمەتٸنٸڭ مەلٸمەتٸنشە, سارىاعاش سوتى جەبٸرلەنۋشٸلەردٸڭ تالاپ ارىزدارىن ٸشٸنارا قاناعاتتاندىرعان. سوت تاشكەنت تۇرعىنى, قازاقستان ازاماتى 46 جاستاعى مەحتيەۆتٸ قىلمىستىق كودەكٸنٸڭ "كٶلiك قۇرالدارىن ساپاسىز جٶندەۋ نەمەسە ولاردى تەحنيكالىق اقاۋلارىمەن پايدالانۋعا شىعارۋ" بابى بويىنشا كٸنەلٸ دەپ, ٷش جىلعا باس بوستاندىعىنان ايىرۋعا ٷكٸم ەتتٸ. سوتتالۋشى جازاسىن قىلمىستىق-اتقارۋ جٷيەسٸنٸڭ قاۋٸپسٸزدٸگٸ بارىنشا تٶمەن مەكەمەسٸندە ٶتەۋ بەلگٸلەنگەن. ٷكٸم كٷشٸنە ەنگەن جوق, تاراپتاردىڭ اپەللياتسييالىق شاعىم تٷسٸرۋگە قۇقىعى بار. بۇل ٸس بويىنشا سوت 24 سەۋٸردە باستالعان ەدٸ.
سوتتا مەحتيەۆ ٶزٸنە تاعىلعان ايىپپەن كەلٸسپەيتٸنٸن, كٸنەسٸن مويىندامايتىنىن ايتقان.
وردۋحان مەحتيەۆ 2018 جىلى 20 قاراشادا تاشكەنتتٸڭ سەرگەلٸ اۋدانىندا ۇستالىپ, 26 جەلتوقساندا قازاقستانعا ەكستراديتسييالانعان.
2018 جىلى 18 قاڭتاردا اقتٶبە وبلىسىنىڭ ىرعىز اۋدانى قالىباي اۋىلىنان 10 كيلومەتر قاشىقتا شىمكەنت - سامارا جولىندا جولاۋشىلار اۆتوبۋسى ٶرتەنگەن. بيلٸك ورىندارىنىڭ حابارلاۋىنشا, اۆتوبۋستا بارلىعى 57 ادام بولعان, ولاردىڭ 52-سٸ قازا بولعان. قۇربان بولعانداردىڭ بارلىعى – ٶزبەكستان ازاماتى. ەكٸ جولاۋشى مەن ٷش جٷرگٸزۋشٸ امان قالعان.
كەيٸن اقتٶبەدە قىلمىستىق ٸس قوزعالىپ, بەس ادام قامالعان. امان قالعان ٷش جٷرگٸزۋشٸ بيىل قاراشا ايىندا بەس جىلعا, اۆتوبۋستى جالعا العان "ازييا ترانزيت سەرۆيس" كومپانيياسىنىڭ قۇرىلتايشىسى مەن اۆتوبۋس مەحانيگٸ ٷش جارىم جىلعا سوتتالعان. ايىپتالۋشىلار تاعىلعان ايىپتاردى مويىنداماعان.
