Aqtóbede beitanys adam dúken ishinde oqýshyǵa tátti usynyp, keiin ony mektepke izdep barǵan. Ákimshilik quqyqbuzýshylyq týraly Kodekstiń eki baby boiynsha is qozǵaldy, dep habarlaidy QazAqparat.
Oqiǵa Aqtóbe qalasyndaǵy №2 orta mektebinde boldy. Mektep direktory Sániia Danishevanyń aitýynsha, 19 sáýir kúni 3-synyptyń oqýshysy sabaqqa kele jatyp, dúkenge soǵady. Sol kezde beitanys er adam oǵan shokolad usynǵan.
«Er adam aty-jónin aityp, oǵan shokolad bergen. Ony aǵylshyn tili pániniń muǵalimi baiqap qalǵan. Er adammen mektep aýlasynda sóilesip, oqýshy qyzǵa týystyq qatynasynyń joq ekenin bilgen. Keiin odan mektep aýlasynan shyǵýyn suraǵan. Birden mektep ákimshiligine habarlama berdi. Kezekshi oqýshynyń ata-anasyn shaqyrdy. Sodan soń ekinshi aýysymdaǵy balalardyń ata-analarynan balalaryn tek ózderi alýyn suradyq. Sonymen birge, synyp jetekshileri men ata-analardyń muiiat bolýy úshin qaýipsizdik kúsheitilip, buiryq shyǵaryldy. Aqparat mektep inspektoryna habarlandy. Ata-analary bir kún ótken soń politsiiaǵa aryz jazdy», - dedi Sániia Danisheva.
Aitýynsha, er adam mektepke kelgen soń, keshkilik ata-analarmen birge aýla ishinde kútip turǵan.
Aqtóbe oblystyq politsiia departamenti osy oqiǵadan soń ákimshilik is qozǵalǵanyn habarlady.
«QR Ákimshilik quqyqbuzýshylyq týraly kodekstiń 449 jáne 517-baptary boiynsha qoǵamdyq orynda kámeletke tolmaǵan balaǵa tiisý deregi jáne QR Kóshi-qon zańnamasyn buzǵany úshin 1961 jylǵy er adamǵa ákimshilik is qozǵaldy. Budan ári sot sheshimi qabyldanǵan soń, memleket shekarasynan shyǵarý sharasy qarastyrylady. Onyń aitýynsha, 19 sáýir kúni qaitys bolǵan ákesin eske alý kúni dúkende kámeletke tolmaǵan qyz balaǵa tátti usynǵan, keiin mektepke baryp, oǵan óz qolymen salǵan sýretterdi bermek bolǵan», - dep habarlady oblystyq PD baspasóz qyzmetiniń jetekshisi Erbolat Sarqulov.
Atalǵan orta mektepte 1500 bala oqidy. Munda 11 syrtqy, 13 ishki kamera bar.
«Mundai jaǵdai anyqtalǵannan keiin qalalyq bilim bólimi barlyq mekemege habarlaidy. Qaladaǵy mektepterdiń bárinde kamera bar, kúzet mekemelerimen kelisimshart jasalǵan. Mektep aýlasynan bógde adam kórse, birden habarlama beredi. Bul - algoritm. Mektep ákimshiligi anyqtaidy, ata-anaǵa habarlasady. Taǵy da mektep ákimshilikterine muqiat bolýdy eskertip otyrmyz», - dedi Aqtóbe qalalyq bilim bóliminiń basshysy Metgúl Qosymbaeva.
