Aqtóbede dástúrli oqý formatyna ruqsat berildi. Mektepter men arnaýly, joǵary oqý oryndaryna arnaiy QR kod arqyly kirgiziledi. Sonymen birge ashana jumys isteidi, dep habarlaidy QazAqparat.
Aqtóbe oblystyq sanitariialyq-epidemiologiialyq baqylaý departamenti 2021-2022 oqý jyldaryna arnalǵan jańa qaýly shyǵardy. Óńirdegi barlyq bilim berý mekemesi shtattyq rejimde jumysyn bastaidy. Tek birqatar sanitarlyq talapty qatań saqtaýy tiis. Birinshiden, pedagogtar men qyzmetkerlerdiń bári vaktsina saldyrǵan bolýy tiis. Tek meditsinalyq qarsy kórsetilimi bar adamdar men COVID-19-dy juqtyryp, aýyrǵanyna úsh ai tolmaǵandar anyqtamasyn kórsetýi qajet. Ekinshiden, barlyq bilim berý uiymyna Ashyq qosymshasy engizilip, ata-ana men muǵalimder, qyzmetkerler, arnaýly jáne joǵary oqý ornynyń stýdentteri QR kod arqyly qaýipsiz mártebesin kórsetýge mindetti.
«Maska taǵý, ara qashyqty saqtaý tártibi saqtalýy tiis. Sonymen birge esik aldynda dene qyzýy ólshenip, sanitaizerler ornatý mindetteledi. Ǵimarat ishin jii tazartý, jeldetý qajet. Buqaralyq is-sharalardy ótkizýge tyiym salynady. Mektepke deiingi jáne orta bilim berý uiymdarynda toptar men synyptardy biriktirip, túrli sharalar ótkizýge bolmaidy. Bastaýysh, orta jáne joǵary synyp oqýshylaryn bólek-bólek oqytý usynyldy. Olardyń sabaq ýaqyty men qońyraý kestesi ártúrli bolady. Ashanada tamaqtanýǵa bolady, biraq sanitarlyq talap saqtalýy tiis. Al stýdentterdiń jataqhanasyna bógde adam kirgizilmeidi», - dep jazylǵan qaýlyda.
Sonymen birge stýdentterdiń vaktsinanyń ekinshi komponentin alýy úshin jyljymaly meditsinalyq pýnkt uiymdastyrý mindetteldi.
