© Photo: QR Tótenshe jaǵdailar ministrligi
Aqtóbe qalasyndaǵy mektepterdiń birinde órt shyqty. Júzdegen bala qaýipsiz jerge shyǵaryldy, dep habarlaidy "Ult aqparat" TJM baspasóz qyzmetine silteme jasap.
Vedomstvo málimetine sáikes, búgin tańǵy saǵat 08:01-de "112" qutqarý qyzmetine №23 orta mektep-litseiinde órt shyqqany týraly habar túsken. Oqiǵa ornyna birden 53 qutqarýshy men 14 tehnika jiberilgen.
Qutqarýshylar jetken kezde 1-qabatta ornalasqan kabinet órtenip jatqan.
"Olardyń jedel áreketiniń arqasynda mektep-litseiden 890 oqýshy men 60 eresek adam evýakatsiialandy. Zardap shekkender joq" - delingen habarlamada.
Tilsiz jaý saǵat 08:12-de tolyqtai aýyzdyqtaldy. Aldyn ala málimetke sáikes, órt elektr symdarynyń qysqa tuiyqtalýynan shyqqan.
