Aqtóbe mektep oqýshysy Mirasbek Dáýletiiar pyshaq jaraqatynan kóz jumdy. Qylmystyq is qozǵalyp, 2002 jyly týǵan taǵy bir mektep oqýshysy óz kinásin moiyndady, dep habarlaidy QazAqparat tilshisi.
Aqtóbe oblysy, Shalqar qalasynda mektep oqýshysy aýrýhananyń jansaqtaý bóliminde kóz jumdy. Dárigerler qan kóp ketkenin, ómirin saqtap qalý múmkin bolmaǵanyn aitty. Al búgin oblystyq politsiia departamentiniń baspasóz qyzmeti qylmystyq is qozǵalǵanyn málimdedi.
«26 qańtar kúni aýdandyq aýrýhanaǵa 16 jastaǵy jasóspirim pyshaq jaraqatymen jetkizildi. Ol keýde tusynan alǵan jaraqattan sol kúni kóz jumdy. Kúdikti retinde Shalqar qalasynyń 17 jastaǵy turǵyny ustaldy. Ol óz kinásin moiyndady. Qazir Qylmystyq kodekstiń «Adam óltirý» baby boiynsha tergeý júrip jatyr. Kúdikti ýaqytsha tergeý oqshaýlaǵyshyna qamaldy, - dep habarlady oblystyq politsiia departamentiniń baspasóz qyzmeti.
Al qaza bolǵan Mirasbek Dáýletiiar oqyǵan mektep direktory Aliia Ospanovanyń aitýynsha, oqiǵa 26 qańtar kúni saǵat 19:00 shamasynda bolǵan. Shalqar kólindegi muz aidynynda oqýshylar top bolyp tóbelesken.
«Eki mekteptiń oqýshylary arasynda tóbeles bolǵan. Sóz kótere almaǵan siiaqty. №6 orta mekteptiń 10 synyp oqýshysy qaltasyndaǵy pyshaqty suǵyp alǵan. Bizdiń mekteptiń oqýshysy reanimatsiialyq ústelde kóz jumdy», - dedi I.Úrgenishbaev atyndaǵy orta mektep direktory Aliia Ospanova. Qaitys bolǵan Mirasbek Dáýletiiar bokspen shuǵyldanyp, júldeli oryndardan kórinip júrgen.
