Balalardyń quqyqtaryn qorǵaý komiteti Aqtóbe oblysynda oqýshymen bolǵan jaǵdaidy baqylaýda ustaidy, dep habarlaidy "Ult aqparat" Bilim jáne ǵylym ministrligine silteme jasap.
Aqtóbe oblysy ákimdiginiń bilim basqarmasy 7 jasar balanyń ata-anasynyń ótinishi týraly buǵan deiin komitetke habarlamaǵan.
Osyǵan bailanysty komitet laýazymdy tulǵalardy jaýapkershilikke tartý jóninde ótinish joldady.
Aqtóbe oblysynyń bilim salasynda sapany qamtamasyz etý departamenti mektep qyzmetkerlerine qatysty tergeý jumystaryn bastady.
Esterińizge sala keteiik, Aqtóbe oblysynda mektep oqýshysynyń týystary jýrnalisterge 7 jasar balaǵa zorlyq-zombylyq jasalǵanyn habarlaǵan bolatyn.
Qazirgi ýaqytta tergeý amaldary júrgizilip jatyr. Tergeý múddesi úshin istiń egjei-tegjeii jariia etilmeidi.
Bilim, densaýlyq saqtaý, halyqty áleýmettik qorǵaý uiymdary qyzmetkerleriniń quqyq qorǵaý organdaryna qylmystyq nemese ákimshilik quqyq buzý belgileri bar kámeletke tolmaǵandardyń nemese olarǵa qatysty is-áreket jasaý faktileri týraly habarlamaýy ákimshilik jaýapkershilikke ákep soǵady.
Eger aqparat rastalsa, mektep aýmaǵynda zorlyq-zombylyqqa jol bergen jáne oǵan tiisti nazar aýdarmaǵan adamdarǵa qatysty shara qabyldanady.
Aqtóbe oblysynyń bilim basqarmasyna balaǵa jáne onyń otbasyna psihologiialyq kómek kórsetý tapsyryldy.
Aqtóbe oblysynyń kámeletke tolmaǵandardyń isteri jónindegi komissiiasynyń kezekten tys otyrysynda oblys ákimi orynbasarynyń tóraǵalyǵymen kámeletke tolmaǵandar arasyndaǵy quqyq buzýshylyqtardyń, zorlyq-zombylyqtyń aldyn alý máselesin qaraý jáne osyndai jaǵdailardy boldyrmaý jónindegi sharalar keshenin ázirleý tapsyryldy.
