Aqtóbede meditsina qyzmetkerlerine memlekettik nagradalar berildi, dep habarlaidy oblys ákiminiń baspasóz qyzmeti.
Aqtóbede M.Ospanov atyndaǵy BQMÝ kafedra meńgerýshisi Meirambek Qurmanǵazinge «Parasat» ordeni tabys etildi. Aqtóbe meditsina ortalyǵynyń meditsinalyq direktory Ardaq Esenjolova, №3 qalalyq emhananyń bas dárigeri Jánibek Narmuhamedov «Qurmet» ordenin ielendi.
Taǵy tórt dáriger «Eren eńbegi úshin» medalin aldy. Olardyń qatarynda Shalqar, Qarǵaly aýdandyq aýrýhanalarynyń, qalalyq emhanalardyń dárigerleri bar.
Shara barysynda «Shapaǵat» medali, «Densaýlyq saqtaý isine qosqan úlesi úshin» tósbelgisi tabys etildi.
«Búginde elimiz ózge memleketter sekildi koronavirýs indetiniń pandemiiasyna qarsy kúresip jatyr. Bul - óte aýqymdy, aýyr ári qiyn jumys. Memleket qazirgi tańda dertke shaldyqqandar sanyn barynsha azaitýdyń, naýqastardy qajet dárilermen jáne emdeý quraldarymen qamtamasyz etýdiń barlyq sharalaryn qabyldaýda. Osy aýrýmen kúreste dárigerler men medbikelerge úlken júk túsip otyr. Kún saiyn sizder sheksiz batyldyqty, erjúrektilik pen adamdarǵa degen qamqorlyqty kórsetip júrsizder»,- dedi oblys ákimi Ońdasyn Orazalin.
