Aqtóbede oblystyq balalar aýrýhanasynda jatqan 5 jáne 15 jastaǵy baladan Kavasaki aýrýyna uqsas belgiler anyqtaldy, dep habarlaidy "Diapazon" Aqtóbe oblysynyń densaýlyq saqtaý basqarmasyna silteme jasap.
"Oblystyq balalar aýrýhanasynda jatqan eki balada mýltisistemalyq qabyný sindromy rastaldy. 5 jáne 15 jastaǵy balalar aýyr jaǵdaida qabyldanǵan bolatyn. Qazir olar palataǵa aýystyryldy, ómirlerine eshqandai qaýip joq", - dedi oblystyq densaýlyq saqtaý basqarmasynyń basshysy Samat Daniarov.
Onyń aitýynsha, 5 balada Kavasaki sindromy bolýy múmkin degen kúdikpen aýrýhanaǵa túsken. Bul diagnoz úsheýinde rastalmady.
"Koronavirýs infektsiiasy eresekterde tromboemboliia týdyrýy múmkin, al balalarda Kavasaki sindromyn órshitedi. Aýrý dene qyzýyn kóterip, álsizdik pen aiaq-qolda allergiia siiaqty bórtpe paida bolady. Júrek soǵysy da jiilei túsedi", - dep túsindirdi juqpaly aýrýlar jónindegi bas maman Meirambek Qurmangazin.
Sondai-aq, ol COVID-19 indetiniń alǵashqy belgileri sezile bastaǵanda-aq dáriger keńesine júginý kerektigin aitady.
Buǵan deiin Italiia, Ulybritaniia jáne AQSh-ta koronavirýs infektsiiasy bar balalarda osyndai asqynýlar tirkelgen bolatyn. Mundai jaǵdaida balalardyń orta jáne kishi arteriialary zardap shegedi.
Al osyǵan uqsas jaǵdailar alǵash ret mamyr aiynda Eýropa elderinde tirkeldi. Nemis buqaralyq aqparat quraldarynda, atap aitqanda Deutsche Welle basylymy ol týraly jazdy.
Maýsym aiynda eki jasar qyz Máskeýde Kavasaki tárizdi sindromnyń qurbany boldy, dep habarlady RIA Novosti.
Shilde aiynda amerikalyq Wall Street Journal AQSh-ta testileý nátijesinde balalardyń koronavirýs juqtyrǵan jaǵdailary anyqtalyp jatqanyn málimdedi. Keibir balalarda COVID-19 juqtyrǵannan keiin denede qabyný protsesi bastalady.
Balalardaǵy sindrom belgileri aiaqtyń isinýi, kózdiń qyzarýy, diareia, qusý siiaqty jaǵdailarmen bailanysty bolyp keledi.
