Aqtóbede jeńil kólik júk kóligine soqtyǵysyp, úsh bala tiridei janyp ketti. Aýrýhanaǵa túsken ákesi de jan tapsyrdy, dep habarlaidy QazAqparat.
Aqtóbe qalasynyń Ońtústik ainalma jolynda jan túrshigerlik jol apaty bolyp, kólik ishinde úsh bala tiridei janyp ketti. Sol kezde kólik rólinde bolǵan úsh balanyń ákesi terezeden túsip qalyp, aýrýhanaǵa jetkizilgen.
«19 aqpan kúni jedel járdem brigadasy er adamdy ákeldi. 45 jastaǵy adamnyń jaǵdaiy óte aýyr bolyp, birden jansaqtaý bólimine jatqyzyldy. Barlyq meditsinalyq kómek kórsetilgenimen, jaraqaty aýyr edi. Ol jansaqtaý bóliminde kóz jumdy», - dep habarlady oblystyq jedel járdem aýrýhanasy bas dárigeriniń orynbasary Nurgúl Tólepqyzy.
