Aqtóbede qoǵamdyq kólik júrgizýshileri tasymaldaýshy kompaniiaǵa eskertpespen jumysqa shyqpai qaldy, dep habarlaidy QazAqparat.
«Búgin jolǵa 137 avtobýs shyǵýy kerek edi. Esh sebep aitpai 80 júrgizýshi jumysqa shyqpai qaldy. №24, 26, 15, 7, 11 sekildi baǵyttar toqtap tur. Habarlama da bermedi. Negizi olar elektrondy bilet engizgen soń ekinshi deńgeili bank arqyly bank kartasyn ashýy kerek edi. Keibiri budan bas tartty. Óitkeni nesie qaryzy, alimenti bar, salyqty tólemegen. Al bank kartasy bar adamdar jalaqysyn alyp otyr. Shynyna kelgende, báriniń kartasy joq dep aita almaimyn. Keibiri bir-birin qoldap, búgin jumysqa kelmedi», - dedi «Avtopark» JShS direktory Aǵarys Tileýlesov.
Onyń aitýynsha, elektrondy bilet tólem júiesi engizilgenimen, tabys artpaǵan. Tehnikalyq qajettilik, salyq pen janar-jaǵarmai, júrgizýshilerdiń jalaqysyn kóterý kiristi arttyrýǵa múmkindik bermegen.
«Qazir júrgizýshiler 120-300 myń teńge aralyǵynda jalaqy alady. Olardyń eńbekaqysy jumys júktemesine qarai esepteledi. Eki ai múmkindik berildi. Bank kartasy bolmasa endi qolma-qol bere almaimyz. Qazir 40-50 paiyzy jalaqy ala almai júr», - dedi Aǵarys Tileýlesov.
Tańerteń júrgizýshilerdiń jumysqa shyqpai qalǵanyn estigen eńbek inspektsiiasynyń ókilderi de seriktestikke bardy.
«Búgin tasymaldaý kompaniiasynyń jumysshylarynan aryz-shaǵym túspedi. Degenmen júrgizýshiler jumysqa shyqpai qalǵan soń sebebin bilýge kelip turmyz. Sebepsiz, negizsiz jumysqa kelmese, tártiptik jaza qoldanylýy múmkin. Onyń tórt túri bar. Tipti jumystan shyǵarýǵa quqyly», - dedi oblystyq eńbek inspektsiiasy basqarmasy basshysynyń orynbasary Talǵat Iskarin.
